Royal Greenland suliniummut Nutaamut nutaanerusumik annerusumillu kilisaatitaarpoq
Royal Greenland Nutaatut tunisassiornermut atatillugu kilisaammik tunitsivimmik nutaamik ukioq manna atulersitsivoq. Kilisaat avalannermi ataatsimi saarullinnik 200 tonsit missaanniittunik useqarsinnaavoq.
Allattoq Mathies Hvid ToftSuliniut Nutaaq ineriartortuarsinnarpoq, tamannalu saarulliit aalisartuniit tigooqqarneqalerpata takuneqarsinnaassaaq.
Ukioq manna Tuneq tigooqqaassaaq. Angallat immikkut sanaajusoq saarullinnik 200 tonsit missaanniittunik tunisassiorfimmut Maniitsumiittumut saarullinnik Nutaatut tunisassiorfiusumut assartuisinnaassaaq.
Sten Sørensen, Royal Greenlandimi saarulliit pillugit ingerlatsinermut aqutsisoq, taama oqaluttuarpoq.
- Suliniutip aaqqissuunneranut annertuumik sunniuteqassaaq. Assersuutigalugu Maniitsumiit Qeqertarsuatsiaanut ulluni pingasuni ingerlaartoqartarpoq, nassuiaavoq nangillunilu:
- Tuneq useqarnerusinnaammat uteqattaarpallaannginnissarput iluaqutaassaqaaq.
Avannaani kujataanilu tigooraassaaq
Suliniut Nutaaq saarulliit siulliit tunisassiorfimmut 2015-imi tulaanneqaqqaarmatali siammaraluttuinnarpoq.
Aallaqqaammut Maniitsumi eqqaanilu aalisartut kisimik tulaassuipput, maannali aalisartut 100-it missaanniittut suliniummi peqataapput.
Saarulliit avannaani Kangaatsiami kujataanilu Paamiuni qassutini uumatitsivinniittut aaneqartarput.
Tassuunakkut kilisaammut uumatitsivimmut siullermut saarullinnik 80 tonsit missaanniittunik useqarsinnaasumut sanilliullugu angallat nutaaq 200 tonsinik useqarsinnaammat pitsanngorsaataangaatsiassaaq.
- Aalisakkat amerlanerusut tunisassiorfimmut aalaakkaanerusumik tulaanneqartalissammata tunisassiorneq aalaakkaanerulissaaq. Tamannalu tamat atugassarititaannut iluaqutaassaaq, Sten Sørensen oqarpoq.
Angallat nutaaq millionilikkaanik aningaasaliiffigineqarpoq
Angallat ukioq manna atulersussaq Royal Greenlandip pigeriigaa aallaqqaammut aalisakkanik ikerinnarniittunik aalisariutaasimavoq.
Ukiorlu aallartimmat Skagenimi qaqeqqalluni piumasaqaatit malillugit allanngorsarneqarpoq.
Annertuumik aningaasaliiffiuvoq, tamannalu suliniummut Nutaamut qanoq tunniusimatiginermik ersersitsivoq.
- Allanngorsarneqarnera sivisullunilu millionilikkaanik aningaasaliiffigineqarpoq, suliniulli Nutaaq aasaaneranilu saarullinniarneq aalisartutsinnut inuiaqatigiinnullu pingaaruteqarluinnartut inerisartuassagutsigit pisariaqarpoq, Sten Sørensen naggasiivoq.
