#4: Ilulissanut tikilluarit
Raajalerivik nunatsinni Ilulissaniittoq Royal Greenlandimi pingaarutilittut inissisimavoq. Raajat aappallorissut Qeqertarsuup Tunuata imartaaneersut tassunga tulaallugillu, qajassuullugit tunisassiaralugillu nunanut tamalaanut nassiussuunneqartarput.
Immakkoorluni Ilulissanut tikikkaanni Royal Greenlandip tunisassiorfiata illutaa siulliullugu takuneqartarpoq. Aalisarfigissaarmat aalisakkat qaleruallillu 1920-kkunnili niuerutigineqartarput. Maanna tunisassiorfiusoq 1961-imi sananeqarsimasoq arlaleriarluni iluarsarneqartarsimavoq, kingullermik 2022/23-imi. Tunisassiorfik ullumikkut nunarsuarmi raajaleriviit annersaat ilagaat.
Tunisassiorfik akuersissuteqarluartunik nutaaliaasunillu raajanut qalipaajaanermut tunisassiornermullu atortoqarpoq, atortuilu ukiut tamaasa raajanik uusunik qaliapaajakkanillu 4.500 tonsinik nunani tamalaani niuerfinnut tunisassiortarpoq. Tunisassiorfik tamatuma saniatigut qaleralinnik ukiumut 2.000 tonsinik, saarullinnik, qeeqqanik ammassannillu tunisassiortarpoq.
Inuttai naapikkit
Tunisassiorfimmi ingerlatsisup Stefán Tryggvasonip Ilulissanut tunisassiorfimmullu tikilluaqquaatigut, tassanilu suleqatigiit 120-it missaanniittut ukioq naallugu sulisarput.
"Maani raajat 100 tonsit qalerallillu 25 tonsit pallillugit ullormut tunisassiarisarpagut, taakkulu qaavatigut saarulliit, qeeqqat ammassaallu tulaanneqartut aamma tunisassiarisarpagut," Stefan nassuiaavoq. "Tassa maani Royal Greenlandip siunertaa takuneqarsinnaavoq - Ilulissat nunarsuarmi raajanik aalisarfinnut pitsaanerpaanut qanittumiippoq. Kilisaatit raajat qaqerlaat ullut tamaasa maanga tulaattarpaat.
Raajat nutaarsunnittuunissaat qulakkeerniarlugu kilisaatit ullut sisamaannaat aalisaqqusaapput. Taava pisarineriniit pisisartunut apuunnissaannut nutaarsunninnerisa attatiinnarnissaat uagut suliassaraarput," Stefan nassuiaavoq. "Soqutiginarluinnarlunilu akisussaafferujussuuvoq."
"Raajalerivik sikoqassuseq apeqqutaatillugu ukioq naallugu tunisassiortarpoq. Ukiut ilaanni aalisariutit tulassinnaanngikkaangata februaarimi marsimilu sapaatit-akunnerini arlalinni matoqqasinnaasarpugut".
Time:
Royal Greenlandip tunisassiorfia Ilulissani suliffeqarfiit annersaasa ilagigamikku annermik qalerlalinnik raajanillu najukkami aalisartut pisaannik tunitsivittut qitiusumik inissisimavoq.
"Najugaqavissunik pikkorissunillu tunisassiassamik taama pitsaatigisumik passussinermik ilisimasaqarluartunik sulisoqarnermut nuannaarutigaarput. Sulisussaqarniarnerlu ajornakusoorsinnaasoq aamma ilisimaneqarpoq, inuusuttummi allanik periarfissagissaarput, taamaammallu nunanit allaneersunik pikkorissumik tunisassiorfimmi sulisoqaratta tamanna tamatsinnut pitsaasuuvoq."
Tunisassiorfiup iluani
Aalisarnerup nalaani raajat qaqerlaat ullut tamapajaasa tulaanneqartarput, taavalu ingerlaannartumik uunneqarlutillu, qalipaajarneqarlutillu, qeritinneqarlutillu, immikkoortiterneqarlutillu poortorneqartarput. Suleriuseq ingerlaartoq atorlugu raajat qaffasinnerpaamik pitsaassusillit nutaarsunnilluartullu qulakkeerneqartarput.
Tunisaassiorfiup aamma septembarimiit maajimut raajat kilisaatini qerisinneqarsimsut tunisassiarisarpai. Raajat marloqiusamik qeritinneqarsimatillutik pitsaassusaat assigiissaarlunilu mamarluinnartuusarput. Aammattaaq ukioq naallugu tunisassiornermi sulisutsinnut ataavartumik suliffissaqartitsineq qulakkeerneqarpoq.
Tunniusimaneq piumasaqaatillu qaffasissut
Pamela Ignacio Reyes raajalerivimmi pitsaassutsimik nakkutilliinermi ingerlatsisutut atorfeqarpoq.
"Avinngarusimasumiittugut oqaatigineqartaraluartoq, tunisassiorfik pitsaassutsimut piumasaqaatit qaffasinnerpaat najoqqutaralugit tunisassiortarpoq," Pamela nassuiaavoq. "Annertuukkaanik pisisartunik suliaqarfinni qaffasissumik piumasaqaatilinni sullissisunik pisisartoqaratta tunisassianik qaffasissumik pitsaassusilinnik pilersuinissarput pingaarnerpaajusariaqarpoq. Raajat tunisassiagut BRC naapertorlugu A+-tut akuerisaallutillu raajat qalipaanik qajuusiagut A++-tut MSC-tullu akuerisaammata tamanna tunniusimanitsinnut uppernarsaataalluarpoq" Pamela qungujuppoq.
"Tunisassiamik taama immikkuullaritsigisumik suliaqarneq sulinerma nuannernerpaartaraa. Aqutsisugut, suleqatigut sulisullu allat aaqqissuussilluarnikkut akunnattoorfeqaratik sullarilluinnartuupput, tamannalu tunisassiorfiup tunisassiorluarsinnaaneranut tunisassiallu pitsaassusaannut sunniuteqarpoq. Taamatuttaaq aalisariutit qanimut attaveqatigalugillu pisaat tulaffissaallu eqqumaffigisarpagut. Tunisassiorneq siumungaaq pilersaarusiussagaanni periusissaq nalilersorneqaqqittuassaaq. Akunnermi ataatsimi uuttakkavut qalipaajartakkagullu annertussuseqatigiittuaannarput, taava raajat tunisassiarisagut ikinneruppata ullormut sivikinnerusumik sulissaagut."
"Maani sulinerup nuannequtaa tassaavoq tunisassiassap immikkuullarissup tunisassiarinera. Aalisariutit qanimut attaveqatigilluarlugillu qanoq annertutigisumik aalisarnersut qaqugulu tulaassissanersut ilisimasarparput. Taamaaliornikkuinnaq tunisassiornissaq siumungaaq pilersaarusiorsinnaavarput, pilersaarutilli nalilersoqqittuaannarpagut. akunnermi ataatsimi uuttakkavut qalipaajartakkagullu annertussuseqatigiittuaannarput, taava raajat tunisassiarisagut ikinneruppata ullormut sivikinnerusumik sulissaagut."
Immikkoortiterinermut atortoq nutaaq 2018-imi atulersinneqarpoq, tassanilu raajat angissutsinut assigiinngitsunut arfinilinnut immikkoortiterneqarsinnaapput, taamaalilluni pisisartut piumasaqarnerisut tunisassiat assigiissaartut tunisassiarineqarsinnaalerput.
Raajat imartatsinneersut iggavimmi assigiinngitsunik nerisassiarineqarsinnaanermikkut nunarsuarmi piumaneqarluarput. Patitamiit raajanik mayomillu akulimmiit salatinut poke bowlinullu nutaalianut.
Igiinnarneqartartut ukkatarineqarput
Raajat qalipaajarneqaraangata raajat nerpii qaleruaanniit niaquiniillu immikkoortinneqartarput. Taakku mineraleqarluartut igiinnarnagit tunisassiorfimmi immikkut ittumi qaleruanit qajuusiornermi atorneqartarput. Qaleruat kissallugillu, panertillugillu aseqqorissunngorlugit qajuusiarineqartarput, taakkulu tunisassiorfinni allani mamarsaatitut qalipaatitulluunniit atorneqarsinnaapput.
Tunisassiorneq raajaleriviup saniani tunisassiorfimmi immikkut ittumi ingerlanneqartarpoq.
Saniatigut pisanik tunisassiat arlallit misissorneqaleruttorput, assersuutigalugu mineralit inuussutissallu imermit uutsiviusumiit qanoq piiarneqarsinnaanersut ilisimatusarfigineqarput.
Royal Greenland naapiguk pillugu
Royal Greenland naapiguk pillugu
Royal Greenland naapiguk' pillugu allaaserisatsinni Royal Greenlandip immikkoortortaani assigiinngitsuni takornariartissavatsigit; Nunatta kitaata sineriaani tunitsivinnit minnerniit kilisaassuarnut avaatsiorlutik tunisassiortunut, nunani tamalaani tuniniaavitsinniit allarpassuarnut. Royal Greenland Naapiguk atuarluariuk!
