- Royal Greenlandi isertitaqarnerulersitsivoq
Taama oqarpoq Qeqqata Kommuniani kommunalbestyrelsimi ilaasortaq Maniitsumeersoq, Karl Lyberth. Saarulliit uumasut Maniitsup eqqaani aalisartut pisaat uumatitsivimmiiteriarlugit Maniitsumi tunisassiorfimmi Nutaaq Cod-iliaralugit Royal Greenlandip 2014-imi tunisassiarisalermagit Maniitsumi innuttaasut ataasiakkaat isertitarisartagaat agguaqatigiisillugit procentinik 22-inik qaffannera pillugu, Karl Lyberth taama oqarpoq.
Nunatta Natsorsueqqissaartarfiata kisitsisaatai naapertorlugit Maniitsumi innutaasut ataasiakkaat isertitaat 2013-imi 176.388 koruuniusut 2016-imi 215.429 koruuninut qaffassimapput, qaffaallu procentinngorlugu 22,15 procentiuvoq. 2016-imi Maniitsumi inuit sulisinnaasut 1.256-iusut akileraarutigalugit ukiumut isertitaat ukiut pingasut ingerlaneranni 39.071 koruuninik qaffassimapput.
Illoqarfiup uummatigaa
-Royal Greenlandip Maaniitsumi aalisarnikkut inerisaanera aamma Nutaaq Cod-inik tunisassiulernera Maniitsumi aningaasaqarnikkut pitsaasumik ineriartortoqarneranut pissutaasoq qularnanngilaq. Aningaasatigut isertitaqarnerulerneq aalisartunut tunisassiorfimmilu sulisunut kisimi sunniuteqarani aamma illoqarfimmi inuussutissarsiornikkut tamatuttaaq Qeqqata Kommuneanut pitsaasumik sunniuteqarpoq. Tamanna Maniitsumi innuttaaqataasutut kommunalbestyrelsimilu ilaasortatut qujamasuutigeqaara, Karl Lyberth oqarpoq, nangipporlu:
- Naatsumik oqaatigalugu Royal Greenlandip illoqarfiup uummatigaa. Taamatuttaaq saarullinnik tunisassiorneq unitsinneqarallaraangat qaleralinnik tunisassiortoqartalernera pingaaruteqarpoq, tunisassiorfimmi sulisut ukioq naallugu suliassaqarnisssaannut tamannalu ilutigalugu aalisartut saarullinnik tunisisinnaanerisa ingerlaannarnissaanut tunngaviummat. Tamanna illoqarfimmi najugalinnut kajumissuseqalersitsilluarpoq. Taamaattumik Royal Greenlandip illoqarfiup tunisassiorfiani suli inerisaaqqinnissaa pissanganartippara.
Nunatta Naatsorsueqqissaartarfiata kisitsisaatai naapertorlugu Maniitsumi najugaqavissut akornanni aalisarnermik piniarnermillu inuussutissarsiutillit 2013-imi 259-iusimasut 2015-imi 421-iupput.
Illoqarfinni Paamiuni Aasiannilu Maniitsumi inuttaasut amerlaqatingajaanik innuttaqartuni agguaqatigiissillugu innuttaasut isertitaat 2013-imiit 2016-imut Paamiuni 3,95 procentinik qaffariarsimasut Aasianni 11,08 procentinik qaffassimapput.
Paasissutissat:
Allattoq assiliisorlu: Inga Egede, ineg@royalgreenland.com
