Royal Greenland 108.836 koruuninik Neriuffimmut tunissuteqarpoq
Royal Greenlandip sinerissami tunisassiorfiini tunitsiviinilu sulisut, kilisaatini inuttat kiisalu qullersaqarfimmi Nuummiittumi sulisut, Neriuffiup 2020-mi nuna tamakkerlugu katersuiniarneranut katillugu 54.418 koruuninik katersisimapput.
Royal Greenlandimi tapiissuteqartarnermut ataatsimiititaliaq katersorneqartut annertussuseqataanik tapiissuteqarmat aningaasat katillugu 108.836 koruuninik annertussusillit Neriuffiup nuna tamakkerlugu katersuiniarneranut, 2020-mi tallimanngornermi oktobarip 30-ani unnukkut toqqaannartumik KNR-TV-kkut aallakaatinneqartumi, tunniunneqarput.
Aningaasaqarnermut pigisanillu nalilinnik aqutsinermut ilinniartup Miki Eriksen Jensenip, naatsorsuuseriffimmi ilinniartup, Royal Greenlandip Neriuffiup nuna tamakkerlugu katersuiniarneranut tunissut TV-kkut toqqaannartumik aallakaatitsinermi tunniuppaa.
- Royal Greenlandimi suleqatikka Neriuffiup 2020-mi nuna tamakkerlugu katersuiniarneranut aningaasat taamak amerlatigisut katersorsinnaasimammatigit torrageqaara. Suleqatikka sinnerlugit aningaasat taamak amerlatigisut tunniutissallugit toqqagaasimanera tulluusimaarutigaara. Aningaasat kræftimik napparsimalersimasunit ilaqutaannillu pisariaqartinneqaqaat, Miki Eriksen Jensen oqarpoq.
Pisortaq nuannaarpoq
Jens K. Lyberthip, Royal Greenlandimi attaveqatigiinnermut sulisoqarnermullu pisortap, sulisut katersuiniarsimanerat nuannaarutigaa.
- Royal Greenlandimi sulisut nuna tamakkerlugu katersuiniarnermut aningaasanik tunniussassanik – aasit – katersuiniarsimanerat iliuuseq kusanarpoq. Aamma aningaasanik taamak amerlatigisunik katersuiniarsimanerat. Tamanna kusanarluinnarpoq, tunissuteqarsimasullu tamaasa qutsavigaakka, Jens K. Lyberth nuannaarluni oqarpoq, nangipporlu:
- Aningaasat kræftimik napparsimalersimasunut ilaqutaannullu atorneqassapput. Napparsimalersimasoq katsorsartittussanngoraangami ilaquttani illoqarfinilu qimallugit maqaaseqalugillu katsorsartikkiatorsinnaasarpoq. Piffissami ilungersunartumi aningaasat ilaqutariinnik ataatsimoortitsinissamut atorneqarnissaat nalunagu tapersersorusunnaqaaq, Jens K. Lyberth oqarpoq.
Royal Greenlandip tunisassiorfiini, tunitsiviini, kilisaataataani qullersaqarfianilu sulisut akissarsiaminniit ilanngaatsillutik Neriufimmut aningaasanik tunissuteqarnissaminnut neqeroorfigineqarput.
