Ukiuunerani OL-mut anngunniunneq

- Ingerlalluarpunga. Sungiusaasortaarnikuuvunga uannik niviarsiaqqanillu allanik marlunnik sungiusaasartumik, taamaalillunga aallunneqarnerulerpunga. Siornatigut eqimattami inuit arfineq-marluniit arfineq-pingasut tungaannut amerlassusillit sungiusaqatigisarpakka, Nuunu Chemnitz Berthelsen, Italiami illoqarfimmi Livignomi pisuttuartoq naapikkatsigu taama oqaluttuarpoq.

Nuunu ulluinnarni Kronplatzimi najugaqarpoq, piffissamilu matumani pisortatigoortumik unamminernut sapinngisamik amerlanerpaanut, nunat tamalaat sisorarnermut kattuffiannit FIS-løbimik taaneqartartumit aqqissuussanut peqataarusulluni Europami angalaqattaarpoq. Tassani sangusaarnermi sangusaapiloornermilu unammisarpoq, Beijingimilu ukiuunerani OL-mut februaarip sisamaanni 2022-mi aallartittussamut anngunnissaminut FIS pointit ikittuinnaat amigaatigai.

Nuunu sungiusimasamini. Sisorartarfimmi Saas Fee-mi Schweizimiitumi, sisupiloornermi apuuffissakkoortinnani.

Sangusaarluni sisorartartoq Nuunu Chemnitz Berthelsen saamerleq, taavalu Antonia Meurer Tysklandimeersoq talerperleq Vicy Palla Englandimeersoq Livignomiitillutik tuiminnik kiveqqagaat. Taakku marluk, ulluinnarni Østrigimi najugaqartut, Nuunup sungiusaqatigisartagarai

Nuunu Chemnitz Berthelsen Crossfit-erluni sungiusartalernermi kingorna nukittunerulerpoq. Uani Crossfit Inua-mi angutaatini Niels Peter Nuunu Johnsen taassumalu anaanaa Súsan Ýr Gudmundsdóttir Johnsen sungiusaqatigereerlugit.

Nuunu OL-imut anngutissanersoq kingusinnerpaamik anngunnissamut killissarititaasumi januaarip 15-anni 2022-mi paasiumaarparput. Siusinneroratarsinnaavoq. Weekendimi FIS-løbimut peqataassallunilu sapaatip akunnerata tulliani Europa Cupimut sangusaarnermi sangusaapiloornermilu peqataassaaq.

Unamminissanut aggersunut OL-imullu anngunniarnermut tunngatillugu qanoq misigisimava.

- Isumalluarlungalu unamminissamut piareersimalluartutut misigisimavunga. Aasaq Crossfit Inuami aapparma anaanaatalu ilaserimmannga sungiusartalerpunga. Taamatut sungiusarnerup nukittunerulersippaanga, oqarpoq.

Timersuummi qanorluunniit pisoqaratarsinnaavoq

FIS-løbinut annertuunut peqataassagaanni timikkut piareersimalluinnarnissaq pingaaruteqarpoq, unamminernulli taakkununnga peqataasut tamarmik annikitsuaqqat apeqqutaalluinnarnerat ilisimavaat. Sekundip ataatsip iluani ajorsartinneqarsinnaavutit. 

- Sangusaarluni unammineq sukkangaarmat qisuariataarsinnaassuseq atorlugu sisusoqartarpoq. Akunnermut 60 kilometerinik sukkatigaluni sisutilluni eqqarsarnissamut periarfissaqanngilaq. Taamaammat sisorarfinni pissutsinilu assigiinngitsuni sungiusartarnissaq pingaaruteqarpoq. Sisorarfimmi aput qanoq ippa, sioqqullutit inuit qassit sisusimappat sisuleruillu aput qanoq manngertigaa? Tamakku kiisalu tarnikkut nukittussuseq unamminerup inerneranut pingaaruteqaqaat, Nuunu nassuiaavoq, nangipporlu:

- Siornatigut unamminissaq sioqqullugu ”qerisutut” misigisimangajattarpunga, taamaammat sungiusaasortaaralu tarnikkut piareersarnissaq aallutingaatsiarnikuuarput. Unamminissanut aggersunut piareersimanerusutut misigisimavunga.

Nuunu weekendini tulliuttuni sangusaarnermi sangusaapiloornermilu unammissaaq, taamaammallu Nuummut ilaquttani juullisioqatigiartorlugit angerlarnavianngilaq.

( VM-imi unammineq pillugu allaaserisaq uani atuaruk https://www.royalgreenland.gl/royal-greenland/nutaarsiassat/nutaarsiassat/Aqagu-Nuunu-VM-imi-unammissaaq/ )

Sisorarnermik aallutaqarneq akisuvoq

Nuunu nunagisaminit, ilaqutariinnit Chemnitz Bertelsenikkunnit aappaminillu Niels Petermit tapersersorneqarluarpoq, taamaalillunilu OL-mut anngunniunnissani tamakkiisumik aallussinnaavaa. Timersornerli akisuvoq. Taamaammat Nuunu arlalinnit taperneqartarpoq, Royal Greenlandilu taakkununnga ilaanermigut 2021-mi 50.000 koruuninik 2022-milu 50.000 koruuninik tapiisimavoq.  

( Tapiiffigineqarneq pillugu allaaserisaq uani atuaruk https://www.royalgreenland.gl/royal-greenland/nutaarsiassat/nutaarsiassat/Sangusaarluni-sisorartartoq-Royal-Greenlandimit-aningaasatigut-tapiiffigineqarpoq/ )

- Nunagisanni ilaquttannit suliffeqarfinniillu tapersersorluarneqarnera nuannaarutigeqaara. Timersuut aallutara akisoqimmat tamanna uannut isumalerujussuuvoq, ukiumummi aningaasarpassuit atorneqartarput, Nuunu oqarpoq. 

Sungiusaasup aningaasarsiai aningaasartuutini annerpaapput, tamatumali saniatigut ukiut tamaasa sisoraatit illugiit arfinillit, støvlit, ajaappiat, atisat, aaqqatit, isarussat nutaat sisorartarfimmullu isissutissat pisiarisartussaavai. Tamakku saniatigut inuuniutissat, angalanernut, unnuinernut unammeqataanermullu akiliutit aningaasartuutaapput.

- Nunagisanni feeriaraangama sulisarpunga, aningaasatigullu taperneqartinnanga OL-imut anngunniarnissara periarfissaanavianngikkaluarpoq. Taamaammat periarfissaatillugu tapersersorneqarnera qujassutigerusuppara. Royal Greenlandip saniatigut Elite Sport Greenlandimit, Qajaq Trawlimit, Ittu.netimit, Tegnestuen Qarsoq-mit kiisalu Kalaallit Nunaanni Sisorartartut Kattuffiannit taperneqartarpoq.

Nuunup ukiuunerani OL-imut anngunniarneranut FIS-app imaluunniit instagramikkut Nuskimo aqqutigalugu malinnaasinnaavutit.