SULISA+ Qasigiannguani ingerlanneqarpoq

Royal Greenlandip tunisassiorfiani Qasigiannguaniittumi sulisut 66-it sukumiisumik pikkorissarnermut SULISA+-mut 2021-mi oktobarip 17-annit 22-ata tungaanut ingerlanneqartumut peqataapput. Pikkorissarnermi inuttut ineriartorneq, atugarissaarneq, suleqatigiinneq naleqartitallu qitiutinneqarput, pikkorissarnerlu suliffeqarfiup tunisassiorfiinut annernut tulluarsagaavoq. Paamiuni, Nuummi, Maniitsumi Sisimiunilu tunisassiorfinni sulisut 2019-mili SULISA+-mut peqataallutik naammassisarsimapput. Pikkorissaanermut akisussaasoq, Sulisoqarnermi ineriartortitsinermut aqutsisoq, Sara Biilmann Egede, ima nassuiaavoq;

- SULISA+-mi pikkorissaatinnata tunisassiorfimmi suleriutsit, sulinermi atugassarititaasut pissutsillu misissortarpakka. Taakku paasereeraangakkit sulisut ataasiakkaarlugit inuttut ineriartornermi pikkorissarneqartarput, tassanngaanniillu aqutsinermi ineriartorneq kiisalu suleqatigiinneq/teambuilding sammineqartarput. Tunisassiorfimmi naleqartitat suut aallaavigalugit sulisoqassanersoq naggasiutitut sammisarparput, Sara Biilmann Egede oqarpoq.

Inuttut ineriartorneq pissarsiaqarnartoq

Qasigiannguani peqataasut inuttut ineriartornermut tunngatillugu pissarsiaqarluarsimanertik nalunaarutigaat. Tamanna Sulisoqarnermi ineriartortitsinermut aqutsisup tupaallaatiginngilaa.  

- Inuttut ineriartornermik suliaqarneq peqataasunut pisarnertut sakkortungaatsiarlunilu pissarsiaqarnarpoq. Iperaaneq ulloq naallugu aalluttarparput matumanilu sulisut eqimattakkaarlutik misigissutsimik eqqarsaatimillu ulluinnarni ajoqutigisinnaasamik aallunnissaat ilinniartarpaat. Peqataasut SULISA+-mi immikkoortumi matumani pissarsiaminnik ”angerlaassinissartik” nuannaarutiginerarpaat, Sara Biilmann Egede nassuiaavoq.

Qasigiannguani tunisassiorfiup ingerlatsisua, Hans Grønvold, pikkorissaanerup immikkoortuanut taassumunnga ilisarsilluni anngaavoq. 
- Pikkorissaanerup ataasiakkaaraluni misigissusilerinermik aallartinnera pitsaasuusoq isumaqarpunga. Tamanna inuttut suliffitsinnilu kikkuunitsinnik eqqartuinissatsinnut ammaassigami naapertuuppoq, Hans Grønvold oqarpoq. 

Naleqartitalerineq pingaaruteqarpoq

Sulisut ulluni tulliuttuni aqutsinermut suleqatigiinnermullu ilisimasanik sammisaqarput. Tamanna eqimattakkaarluni ilisimasanik kattussilluni sungiusarnikkut ingerlanneqarpoq, matumanilu aqutsisuuneq suleqatigiinnilu sulineq pillugu oqallittoqarluarpoq.

Tunisassiorfimmi aqutsisunut tunisassiorfimmi naleqartitat sulinermi siumungaaq aallaavigineqartussat naggasiutitut erseqqissaatigeqquneqarput. 

- Aqutsisut nammineerlutik naleqartitat sulisunut saqqummiuppaat, tassanngaanniillu naleqartitat pingaarutaat qanorlu paasineqarsimanersut eqqartorneqarpoq. Naleqartitanik ataatsimoorussamik paasinnittaasitaarneq pingaaruteqarlunilu eqqarsartaatsimik pilersitsivoq, Sara Biilmann Egede oqarpoq.

Tunisassiorfimmi ingerlatsisup Hans Grønvoldip sulisunik peqataatitsineq pingaaruteqarlunilu naleqartitalerinermi assersuusiornernik ilisarsiffiusinnaasarmat naleqartitanik sammisaqarneq nuannaraa.  

- Isumaga malillugu immitsinni pissutsinik piviusunik aallaaviginnittuarnerput SULISA+-mi pitsaaqutaavoq. Matumani pikkorissartut erseqqissaanissartik pikkoriffigaat, tamannalu sammisanut paasinninnerulersitsivoq. Maanna ulluinnaat ingerlaqqilerput suliffitsinnullu kiisalu qanoq misigisimarusunnitsinnik paasinninnerulersimavugut, Hans Grønvold oqarpoq ilanngullugulu siunissami naleqartitat aalajangiunneqarsimasut malitseqartinneqassanersut paasinarsiumaartoq erseqqissarpaa.

Naleqartitat toqqarneqartut: Pitsaassuseq, Ataqatigiinneq, Tikilluaqqusineq, Ataqqeqatigiinneq.

Sulisoqarnermi ineriartortitsinermut aqutsisup pikkorissaanerup kingorna sulisunit qisuariaatsit nuannarai.

- Tamakkiisumik isigalugu peqataasunit qisuariaatsit pitsaasorujussuupput, suliartornissartillu qilanaarisorujussuuaat. Peqataasunut sapaatip akunnerata ingerlanera pissarsiaqarnarpoq, Sara Biilmann Egede oqarpoq, nangipporlu:
- Pikkorissaanerup malitseqartinneqarnissaa pingaaruteqarpoq, taamanikkussamullu suut iluatsissimanersut suullu iluatsippallaannginnersut tusassallugit pissanganassaaq.

Malitseqartitsinissaq suli ullulerneqanngilaq. Taamaattorli SULISA+-ip tullissaata Ilulissani upernaaru ingerlanneqarnissaa qulakkeerneqareerpoq.