Atuartut tunisassiorfimmi sulinermik misiliisut:

Atuarfik Ukaliusami, ulluuinnarni USK-imik taaneqartartumi, atuartut tallimat Royal Greenland tunisassiorfiani Nuummiittumi 2021-mi januaarip 18-ianiit 29-ata tungaanut suliffimmik misiliiniarlutik aalajangersimapput. Inuusuttuaqqat ilaatigut aalisakkanik tunisassiornermi pitsaassuseq qanoq pingaaruteqartigisoq pillugu ilinniartinneqaramik tunisassiorfimmi suliffimmik misiliinertik nuannareqaat.

- Soqutiginarlunilu ilikkagaqarnarpoq. Aalisakkanik tunisassiassanik suliaqarneq, tunisassiorneq, qerititsineq, poortuineq tuniniaanerlu pillugit ilikkagaqangaatsiarpunga. Sulinitta nalaani aamma nuannisartaqaagut, tunisassiorfimmilu suleqatitsinnit tigulluarneqaqaagut, 16-inik ukiulik Viiveeraq Lyberth oqarpoq.

Aalisarnerup silarsuaani siunissalik

Atuartuni suliffimmik misiliisuni tallimaasuni sisamat Royal Greenlandip tunisassiorfiani Nuummiittumi suliffimmik misileerusullutik nammineq qinnuteqarsimapput, 16-inilli ukiulik Miki Wallbohm allamik misileerusussimagaluarpoq.

- Suliffimmik misiliiffissannik allamik nassaarsinnaasimanngilanga, ilikkagaqangaaramali tunisassiorfimmi suliffimmik misiliinera ataatsimilluunniit peqqissimissutiginngilara. Siunissami aalisakkerinermik suliaqarnissara suliffimmik misiliininni paasivara. Immaqa kilisaammi aalisartutut, kisianni aamma laboratoriami sulineq soqutigaara, 16-inik ukiulik Miki oqarpoq.

15-inik ukiulik Rico Christensen siornatigut bundgarnersorluni aalisaqataasimavoq, aalisakkanillu tunisassiorneq pillugu ilisimasaqarnerulernini nuannaarutigaa.

- Aalisakkat qaffasissumik pitsaassusilittut tunisassiarineqartussanngorlugit suliarineqartarnissaat qanoq pingaaruteqartigisoq pingaarnertut paasivara. Siunissami aalisakkerinermi suliaqalissaguma ilisimasassanut ilaavoq, Rico oqarpoq.

Ajunngitsumik pineqarput

Suliffimmik mmisiliisut tallimat tamarmik tunisassiorfimmi immikkoortortani tamani, kiisalu tunisassiorfiup najukkamilu tuniniaanermik immikkoortortap allaffiini sulinermik misiliipput.

- Tunisassiorfiup immikkoortortaani tamani sulillunga misilippara. Immikkoortortani tamani suleqatitsinniit ajunngitsorsuarmik aamma pineqarpugut, Karl Jaaku Alaufesen oqarpoq, Viiverarlu ilassuteqarpoq:

- Aasami atuanngiffeqarninni aalisakkerivimmi sulerusuppunga. Atuartut allat tunisassiorfimmi sulinermik misiliissasut aamma innersuukkusuppakka. Suleqatit pitsaapput, aalisakkanillu tunisassiornermik suliaqarneq soqutiginartuuvoq.

Royal Greenlandip tunisassiorfiani Nuummiittumi ingerlatsisup Abia Thorsteinsenip, ukiuni 31-ni aalisakkanik tunisassiornermik suliaqarsimasup, inuusuttut aalisakkerinermik soqutiginninnerat nuannaarutigaa.

- Siornatigut atuartunik suliffimmik misiliisoqarnikuunnginnama inuusuttuaqqat tunisassiorfimmi suliffimmik misiliiniarlutik aalajangersimanerat nuannaarutigeqaara. Tallimaallutik tamarmik tunisassiornermut soqutiginnittupilussuunerat ersarippoq, tunisassiornermilu, aammattaarli aalisarnermi qanoq periarfissaqatiginerlutik ilikkarpaat, Abia Thorsteinsen oqarpoq.

Atuartut suliffimmik misiliisut, Atuarfik Ukaliusami 10.B-mi atuartut, tunisassiorfimmi suliffimmik misliinertik pillugu atuaqatiminnut saqqummiussassaminnik suliaqassapput.