Royal Greenland saarullinniartoqarnissaanut piareersimavoq
Bundgarnersorluni saarullinniarnissaq maanna aallartippoq, taamaalillunilu saarullinnik Nutaaq-tut tunisassiassanik tunisisoqarsinnaanngorpoq. Aalisarfiulluarnissaanut arlalinnik peqqutissaqarpoq.
Ukioq manna bundgarnersorluni saarullinniarnermi ulapaarfik ingerlalluaqqullugu arlalinnik suliniuteqartoqarpoq.
Siullertut uumatitsivik Tuneq siornamiit useqarnerusinnaalersillugu nutarsarneqarpoq. Sten Sørensen, Royal Greenlandimi saarulliit pillugit ingerlatsinermut aqutsisoq, oqaluttuarpoq.
- Tuneq ukioq manna saarullinnik 200 tonsinik tigusisinnaassaaq, tamatumalu saniatigut siornamut sanilliullugu qaammat ataaseq sioqqullugu tikissaaq. Taamaammat aalisartut qassutit saarullinnik uumatitsivigisaasa imaarnissaannut utaqqineq sivikillissallugu naatsorsuutigaarput, Sten nassuiaavoq.
Tuneq tunisassiorfimmut Maniitsumiittumut saarullinnik Nutaaq-tut tunisassiorfiusumut tulaassitinnani siornatigumut sanilliullugu sumiiffinni siammasinnerusuni aammattaaq tigooraasinnaassaaq.
Suliniut Nutaaq tapersersorneqarluarpoq
Maannamut aalisartunut suliniummut Nutaaq-mut tunisisartussanut saarulliit 500 tonsit aaneqartussatut nalunaarutigineqareerput. Tamanna apriilip naanerani aatsaat taama annertutigaaq.
- Saarullinnik Nutaaq-tut tunisassiassanik aalisartuniit ukiuni tulleriinni tapersersorneqarnerput annertusiartuinnarpoq, ukiorlu manna aamma taamaappoq. Saarulliit 500 tonsit aaneqartussatut nalunaarutigineqarsimasut tamanna takutippaat, ulapaarfissarlu qilanaaraarput, Sten Sørensen oqarpoq.
Saarulliit bundgarnersorluni aalisarneqartut tamarmik siornatuulli Royal Greenlandimut tunineqannginnerminni ullut 14-it qassutini uumatitsivinniissimassapput.
Pitsaassuseq qaffasissoq qulakkeerneqarpoq
Taamaaliornikkut saarulliup nerpiata pitsaassusaa qaffanneqartarpoq.
- Nerpia suikkaanerulerlunilu qalipaatiginnerulersarpoq, tamannalu naggataatigut tunisaqarnerunermik taamatuttaarlu aalisartunut uagutsinnullu akit pitsaanerunerinik kinguneqassaaq, Sten Sørensen nassuiaavoq.
Royal Greenlandip qassutit uumatitsiviit aalisartunut akeqanngitsumik atukkiuttarpai. Aalisartulli aalisakkat Royal Greenlandimut tunineqartinnatik toqusimannginnissaat qulakkeerniarlugu nakkutigineqarnissaat namminneq akisussaaffigaat.
Saarulliit ulluni 14-ini qassutini uumatitsivinneereeraangata aalisartut tunisassiorfimmut toqqaannartumik tuninissaamut imaluunniit angallatip uumatitsiviup aallernissaata utaqqinissaannut periarfissaqarput
