KNAPK Ullumi akerliussutsimik takutitsinera Royal Greenlandip akueriniarnagu aalajangerpaa

Ullumi KNAPK Royal Greenland qullersaqarfiata eqqaani akerliussutsimik takutitsippat Royal Greenlandimi siulersuisut najuutissanngillat.

Eqqissisimasumik akerliussutsimik takutitsisinnaanermik pisinnaatitaaffeqarneq akuerillugulu ataqqivarput minnerunngitsumillu tamanut ammasumik oqallissinnaatitaaneq. Siulersuisutulli qinersimavarput akerliussutsimik takutitsisunut najuunnginnissarput, aammalu KNAPK isornartorsiuineranut sulisutta akisussaaffeqartinneqarnissaat kissaatiginngilarput.

Ukiut kingulliit ingerlaneranni KNAPK ataatsimeeqatisisarsimaneranni paasinnilersimagaluarpugut aaqqiisuteqarnissatsinnut qanilliartulerluta, taamaakkaluartoq assigiingittunik tusagassiorfinnut tunngaveqanngitsunik piviusuungittunillu tusarliisarsimapput.

Tamanna tatiginninnermut oqaloqatigiinniarnermullu innarliivoq, akerliussutsisunullu najuutinnginnissatsinnut siunniunnerput tamanna peqqutigivaa. Sulilu nalornissutigaarput akerliussutsimut takutitsineq sunarpiaq imarineraa.

KNAPK siullermeerluni nalunaarutigivaa, akerliussutsimik takutitsiniarnerat orsussap akii qaffakkiartornerinut akerlionerannut imaqartoq, Ullumikkut tusagassiorfinniit allagartanilu atuarneqarsinnaavoq aalisarnermut inatsisip allanngortinneqarnissaanut akerliussutsimik takutitsiniartut, tusagassiorfitsigullu nalunaarutigineqarpoq, aalisakkat tunisat akii appariartuinnarnissaanut tunngasoq.

Ukioq manna Royal Greenland nipisat suaasa aamma Nutaaq saarulliup akii nikisinnginnissaanut aalajangersimavoq, taamaammat ukiup manna akigititap apparneranut tunngasinnaanngilaq. KNAPK Royal Greenlandimut saaffiginninnerminut nalunaaruteqarpoq akerliussutsimut takutitsiniarneq akit pillugit isumaqatigiinniarnernut isornartorsiuinermut tunngassuteqartoq.

Royal Greenland ukiup kingulliup ingerlanerani KNAPK peqatigalugu suleqatigiinnissamik isumaqatigiissuteqarnissamik suliniuteqartaraluarpoq, aalisartut inuiaqatigiillu pitsaanerpaamik atugaqarnissaat pillugit. KNAPK-p pingaaruteqassusia ilisimavarput, suleqatigiinnerlu pitsaasoq anguniarlugu suli aalajangersimavugut.

Taamaattumik Royal Greenlandip siulersuisui ukiup kingulliup ingerlanerani KNAPK peqatigalugu ataatsimiinnerit arlalippassuit ingerlappaat, suleqatigiinnissamik isumaqatigiissuteqarnissaq anguniarlugu, tassani KNAPK Royal Greenlandilu aalisartut inuiaqatigiillu pitsaanerpaamik atugaqarnissaannut suleqatigiissinnaasut amerlasuut sammineqarput.

Tamatumunnga oqaloqatigiinnerni ilaapput pisassiissutinik aqutsineq, imartat naqqani eqqiaaneq, aalisartunut atugassarititaasut pitsanngorsarneqarnissaat aamma tunisassiorfiusuniit atortorissaarutit annertusarneqarnissaannik pisariaqartitsineq.

Ajoraluartumilli oqaloqatigiinnerit angusaqarfiusimanngillat, KNAPK Akit isumaqatigiissutiginissaanut naammagittaalliutigisai pissutigalugit, tamannalu susinnaanagulu ilaaffigisinnaanngilarput.

Suliffeqarfittut akisussaaffeqartuusugut nioqqutissat akii aalajangertariaqartarpagut tuniniaanissamut periarfissat akillu tunngavigalugit. Tunisassiornermut aningaasartuutit aamma naatsorsuutit naammassisaqarfiunissaat eqqarsaatigalugit.

Royal Greenland aalisartunut inuiaqatigiinnullu pilersitaavoq.

KNAPK isumaqarnera naapertorlugu Royal Greenland imminut sullippoq, aalisartullu pisariaqartitaat eqqarsaatiginagit. Erseqqissaatigissavarput Royal Greenland Namminersorlutik Oqartussanit pigineqarmat. Iluanaarutit tamarmik landskassemut nakkartarput, aningaasallu inuiaqatigiinnut atorneqartarlutik, aalisartullu inuussutissarsiuteqarnermikkut isertitaqarnissaat qulakkeerniarlugu pingaarnertut suliassaraarput.