Ajutoorneq ajunngitsumik kingunilik

Alexander Dahl, Heidi Henningsen inuusuttullu isumalluartut allat 2019-imi aggustip naanerani Niuernermik Ilinniarfimmi nunani tamalaani niuerneq aamma niuernermi tuniniaaneq taamatuttaarlu aningaasaqarneq aamma pigisanik nalilinnik aqutsineq pillugit bacheloritut ilinniarnermik aallartitsinissaminnut piareersimapput. Ilinniarnerup aallartinnissaanut ullut marluinnanngortut ilinniakkamut akuersissut inissinneqarsimanngimmat ilinniagaq aallartinneqarsinnaanngitsoq nikalluallannaqisumik ilisimatinneqarput. Ilinniakkat aningaasalersornissaat Aningaasanut Inatsimmi 2020-mi atuuttussami pissarsiarineqaqqaatussaapput, suliarlu taanna qaammatialunnik sivisussuseqartussaavoq. Aningaasat pissarsiarineqassappata ilinniartut aallartinnissaminnut qaammatit tallimat missiliorlugit utaqqeqqaartariaqarput.

Royal Greenland ikiorsiivoq

Ilinniarniarlutik qinnuteqarsimasut tamarmik suliffikuminnut utersinnaasimannginnamik akimmittoorput. Pisoq tusagassiutini sammineqarpoq, Royal Greenlandillu tusagassiutit aqqutigalugit inuusuttut inissisimaffiat paasivaat.

- Royal Greenlandip pisortaanerata Mikael Thinghuusip Royal Greenland arlaatigut ikiuussinnaanersoq paasiniarlugu Niuernermut Ilinniarfimmut saaffiginnittoqassasoq siunnersuutigaa. Ilinniarfiup pisortaa ataatsimeeqatigereerlugu ilutsinnilu ataatsimeeqatigeereerluta allaffitsinni Svenstrupimiittumi suliffimmik misiliiffissanik marlunnik neqerooruteqarsinnaalerpugut, Suliffeqarfissuarmi attaveqatigiinnermut ingerlatsisoq Inga Dora G. Markussen oqaluttuarpoq.

Ilinnialertussat sisamat suliffissarsisimanngitsut paasinarsivoq, taakkulu oqaloqatigiinnissamut aggersarneqarput. Royal Greenlandip oqaloqatigiinnerit kingorna Alexander Heidilu immikkoortortami Nordic Salesimi aamma tuniniaanermut nittarsaassinermullu immikkoortortami, kiisalu aningaasaqarnermik, nakkutilliinermik aamma suliffeqarfissuarmi assartugalerinermik suliaqarfiusumi sapaatip-akunnerini aqqaneq-marlunni suliffimmik misiliinissaannik neqeroorfigai. Suliffimmik misiliineq ilinniakkamut 2020-mi februaarimi akuersissuteqartoqarneratigut atulersinneqartumut ilinniarnermi soraarummeerutigisimasatut nuunneqarsinnaavoq.

Inuttut nikeriarneq

Alexander Heidilu suliffimmik misileereerlutik Nuummut utersimalerput, bacheloritullu ilinniarnertik 2020-mi februaarip tallimaani aallartippaat. Ilinniarnerup aallartinnissaanut utaqqinerminni suliffimmik misiliinissaminnut periarfissinneqarsimanertik marluullutik nuannaarutigaat, ilinniarnerullu aallartinnissaata kinguartinneqarnera ajutoornerugaluarluni ajunngitsumik kinguneqartoq tamarmik isumaqatigiissutigaat.

- Sulisut pikkorissut Svenstrupimi suleqatigalugit pissarsiaqarnaqaaq. Nuannerpoq, suliffimmillu misiliineq pissarsiaqarnarpoq. Oqitsuinnaanngilaq, unammillernartoqaraluartorli misiliinera peqqissimissutiginngilara, Heidi Henningsen Royal Greenlandimi Svenstrupimiittumi suliffimmik misiliinini pillugu oqaluttuarpoq.
Heidi aningaasaqarneq aamma pigisanik nalilinnik aqutsineq pillugu bacheloritut ilinniarnermi ilinniartitsissutigineqartartunut attuumassusilinnik suliakkerneqartarsimavoq.

Alexander Dahlip Nordic Salesimi suliffimmik misiliinini aamma naammagisimaarpaa. Maanna nunani tamalaani niuerneq aamma niuernermi tuniniaaneq pillugit bacheloritut ilinniakkani aallartissimalerpaa.

- Pisoq ajornakusooraluartoq ajutoorneq ajunngitsumik kinguneqartoq oqarsinnaavunga. Ilinniakkannimi atorluarsinnaasannik ilikkagarpassuaqarpunga, taamaammat inuppassuarnik ilisarisimasaqalerlungalu angalanera inuttut nikeriaatigaara. Inuttut ammanerulerpunga, Alexander Dahl oqaluttuarpoq

Teoriit piviusinngortillugit

Alexanderip Heidillu suliffimmik misiliinertik sammisami aalajangersimasumi ataatsimi pissarsiaqarnarluarsimasoq marluullutik oqaatigaat; tassa atuakkani atuarsinnaasatik piviusunngortut.

- Suliffeqarfik angisooq qanoq ingerlanneqartarnersoq pillugu paasisaqangaatsiarpunga. Paasisama ilarsui atuaannarlunga paasisimanavianngikkaluarpakka. Taakkuupput peqataaffigalugit aatsaat ilikkarneqarsinnaasut, peqataaffigisimanerallu nuannaarutigaara, Heidi oqarpoq, nangipporlu:

- Royal Greenlandimi Svenstrupimiittumiinninni teoriit assilisassiallu ilikkakkakka ilinniarnitsinni sammisussaagigut takusinnaalereerpara.