Dronningip Nersornaasiuttagaa saqqarmioq sølviusoq Jens Olsvigimut tunnuinneqarpoq

Jens Olsvigip Ilulissani Royal Greenlandip tunisassiorfiani sulisimanera 2017-imi juulip qulingani nalliuutorsiutigineqarpoq, tassalu Jens Olsvigip ukiut 50-it sulisimaneranut atatillugu Dronningip Nersornaasiuttagaa saqqarmioq sølviusoq tunniunneqarpoq.

Aalajaallunilu qasusuippoq

Tallimanngormat Ilulissani Royal Greenlandip tunisassiorfiani ataatsimuualaartoqarnerani Jens Olsvig Dronningip Nersornaasiuttagaanik saqqarmiumik sølviusumik aamma diplomimik tunineqarpoq. Ilulissani Royal Greenlandip tunisassiorfiani tunisassiornermut aqutsisup Jensigne Schmidtip Dronningip Nersornaasiuttagaa saqqarmioq sølviusoq Jens Olsvigimut tunniukkamiuk ilaatigut ima oqarpoq:

“ Asasarput Jensi, ullorsiornitit suli naanngillat. Ukiut 52-inngulerlugillu nalliuttut maani suliffitsinni annersaat immaqa oqaluttuarisaanermi siullerpaamik Ilulissani nalaapparput. Nuannaarutigaara Ataqqinartorsuup Dronning Margrethep aalajaallutit ukiorpassuarni sulisimasunut saqqarmiuliuttagaa ullumikkut ilinnut tunniussinnaagakku.”

Ukiut 50-it sulisimanera pillugu nalliuttorsiutigineqartoq Jens Olsvig 1990-ikkunni aalisakkerivimmi sulisunut aqutsisunngunngikkallarami tunisassiorfiup raajaleriffiani aamma aalisakkeriviani sulisimasup, Dronningip Nersornaasiuttagaanik saqqarmiumik sølviusumik tunineqarnini tuppalliutigaa.

- Tuppallernaqaaq aamma sulisitsisuma nersornaatip ataqqinartup uannut tunniunneqarnissaa sulissutigisimammassuk qujamasuutigaara. Dronningip Nersornaasiuttagaa saqqarmioq sølviusoq uannut tunniunneqarmat qujamasuutigaara, ataqqinaqaaq, taama oqarpoq Jens Olsvig.

Jens Olsvig oqarpoq ukiorpassuarni sulinerminut piumassseqarnini pissutaasoq.

- Ukiorpassuarni suliffimmi ataatsimi sulininnut piumassuseqarnera pissutaavoq. Suli pisinnaatillunga suliuassaanga, taama oqarpoq Ilulissani Royal Greenlandip tunisassiorfiani ukiuni 52-inngulersuni sulisoq, Jens Olsvig.