Kangaamiuni tunisassiorfiup Nunarput mamartunik pilersorpaa
Ukioq manna ukiorimmat Kangaamiuni saarullinnik aamma qeeqqanik issimi panertitanik panertitsineq iluatsilluarpoq. Kangaamiuni Royal Greenlandip tunisassiorfiani sulisut saarulliit tonsit 28-it sinnerlugit aamma qeqqat 12 tonsingajaat nivinngaassoriarlugit panertitaat tunisassiat pitsaalluinnartut maanna sineriammi pisisartunut nassiussorneqassapput.
Allattoq Inga Egede, ineg@royalgreenland.com- Ukioq manna sila aalisakkanik panertitsiffigiuminarmat saarullinnik qeeqqanillu issimi panertitanik tunisassiavut kusanarluinnarlutillu qaqqoripput. Panertut siulliit februarimi nassiuppagut kingornalu Nuummi Royal Greenlandip Nunatsinni tuniniaavianut ingerlaavartumik nassiussuivugut nassiussueqqissallutalu, taama oqarpoq Kangaamiuni Royal Greenlandip tunisassiorfiani ingerlatsisoq Arona Levisen.
Royal Greenlandip tunisassiorfiini aalisakkanik issimi panertitanik tunisassiortut sisamaasut akornanni tunisassiat affaasa missingi Kangaamiuni tunisassarineqartarput. Kangaamiuni aalisakkat issimi panertitassat tisaneqareeranngamik quersuarmi panersiiviusartumi panersiivinni sanimut aqqaneq marluusuni nivingaassorneqartarput. Nivingaavik sanimut ataaseq aalisakkanik 1,5 tonsit missinginik oqimaassuseqartunik nivingaaviusinnaavoq. Aalisakkat panersikkat 1,5 tonsit paneraangamik 200 kiilut missinginik oqimaassuseqartarput.
Tunisassiorneq
Sulisut qulingiluat 2018-imi novemberimili ingerlaavartumik aalisakkanik panertitassanik tisariarlutik nivinngaaviusartunut sanimut aqqaneq marluusunut aalisakanik nivinngaassuisarput, kingornalu paneraangata poortoriarlugit allanik nivinngaassueqqittarlutik. Panertitassat nivinngerneqareernerminniit qaammatit pingasut missingisa qaangiunnerini panertarput, kisiannili sila apeqqutaalluinnartarpoq.
- Panertitassat kingulliit nivinngarneqareernikuupput naatsorsuutigaaralu majimi panereerlutik nassiunneqarumaartut, Arona Levisen oqarpoq.
Silap qanoq innera sulisullu aalisakkanik panertitsinermi misilittagaqarnerat panertitsinerup qanoq inerneqarneranut aalajangiisuusartoq, tunisassiorfiup ingerlatsisua oqarpoq.
- Aalisakkanik issimi panertitanik tunisassiornermi sila apeqqutaalluinnartarpoq. 2017-imi siusinaarluta okoberimi nivinngaassuuilluta aallartinnikuugatta, siusippallaartumik nivinngaasuinerput isseqannginneralu pissutaalluni tunisassiavut pitsaanngimmata ilinniutigalutigu ukioq manna aatsaat novemberip aallaqqaataata missani panertitassanik nivinngaasuilluta aallartippugut. Sila panertitsiffigiuminarmat aamma sulisut panertitsisarnerni misilittagaqaleriartormata ukioq manna saarullinnik aamma qeeqqanik issimi panertitanik tunisassiavut pitsaalluinnartuupput, Arona Levisen oqarpoq.
Royal Greenlandip tunisassiorfii allat aalisakkanik issimi panertitanik tunisassiortut tassaapput Attu, Ukkusissaq aamma Uummannaq.
Kangaamiuni aalisakkanik panersiivimmi assilisat allaaserisap ataani taukuneqarsinnaapput.
Paasissutissat:
Assit: Arona Levisen.
