Inughuit Seafood A/S-imut tunisineq quleriaammik qaffariaateqartoq
Qaanaami aalisartut Royal Greenlandilu piginneqatigiillutik 2014-imi tunisassiorfik Inughuit Seafood A/S –ip pilersinneraniit tunisassiorfimmut qaleralinnik tunisineq ukiut sisamat ingerlanerini quleriaammik annertusivoq. Piginneqatigiiffiup pilersinneqannginnerani tunisassiorfimmut tunisat ukiumut 20 tonsit missinganiitarnikuusut ukiut sisimat qaangiunnerini november 2017-imiit juni 2018 –i tikillugu qalerallit 225 tonsit tuneqarlutik tunisassiarineqarput.
Allattoq Inga Egede, ineg@royalgreenland.com- Nuannaarutigeqaarput Inughuit Seafood A/S-ip tunisassiorfianut tunisineq tunisassiornerlu ingerlalluarmat. Piginneqatigiiffiup aallartinneraniit siullermeerluni ukioq manna qeritistiviit ulikkaarput, Royal Greenlandimi tunisassialerinermi ingerlatsisoq, Niels Ole Møller oqarpoq.
Inughuit Seafood A/S-ip tunisasiorfiani siornatigut qalerallit ilivitsuutillugit tunisassiarineqartarnikuusut ukioq manna sulisut ilinniartinneqareernerisigut 2018-imi februarimi qaleralinnik niaquikkanik paperuikkanillu tunisassiortalerput.
- Naak qaleralinnik niaquikkanik paperuikkanillu tunisassiorneq kingusissukkut aallartikkaluartoq taammattoq ukioq manna annertunerusumik qaleralinnik niaquikkanik paperuikkanillu sulisut 20-iniit ikinnerunngitsut Inughuit Seafood A/S-ip tunisassiorfiani tunisassiorput. Neriuutigaarput ukiup tullissaani siusinnerusukkut tunisassiulerumaarluta, Niels Ole Møller oqarpoq.
Qalerallit pisarineqartut annertunerpaartaat Qaanaap eqqaani pisarineqartut 71 tonsit Qeqertat eqqaani pisarineqartut Niels Ole Møller paasissutissiivoq.
Ukiumi aalisarfiusumi 2017-2018-imi Qaanaami eqqaanilu aalisartut Inughuit Seafood A/S –imut tunisisarnermikkut katillugit millionit sisamat missingi aningaasarsiarisimavaat.
