Piginnaanillit katerisimaartinneqarput

Royal Greenlandimi tunissassiorfinni suleqatigiinni aqutsisut 20-it Royal Greenland Academy-p aaqqissugaanik januarip 28-ianiit 31-ianut Kangerlussuarmi katerisimaartinneqarput. Royal Greenlandimi ilinniartitaanermut immikkortortaqarfiup siullermeerluni suleqatigiinni aqutsisut piginnaanillit qaaqqullugit katerisimaartippai. Siornatigut katerisimaartitsinerit taamaattut Royal Greenlandimi ilinniartunut ingerlanneqartarput. Katerisimaartitsinermi peqataasut ullut sisamassaa avillugu ingerlanerini Royal Greenland pillugu ilisimasassat aamma inuttut ataasiakkaatut timikkut tarnikkullu peqataalluni aqutsisinnaaneq paasisaqarfigivaat.

Sapaatip akunnerani kingullermi suleqatigiinni aqutsisut pikkorissut 20-it katerisimaartitsinerni qulequtaq “suleqatigiilluni aqutsineq”- sammigamikku atuakkersorneq misileraanerlu aqqutigalugit qanimut suleqatigiinnerup sunniutigisinnaasai paasisaqarfigaat.

- Royal Greenlandimi suleqatigiinni aqutsisut ulluinnarni sulinerminni aalajuarnermikkut piviusoq paasisaqarfigisarlugu sungiusimavaat. Taamaattumik peqataatillugit isumaliortillugillu sungiusartinnissaat pingaaruteqarpoq. Suliffimminnut uterunik katerisimaarnerminni periuseq sammisartik atulernissaanut kajumissuseqalernissaat siunertaavoq. Katerisimaarnermi aqutsisut sammisaat ilinniagaallu ulluinnarni atugarisaannut naleqqussarneqarmat peqataasut ulluinnarni sulinerat aallaavigalugu ilinniartitsivugut, taama oqarpoq tarnip pissusiinik immikkut ilisimasalik aamma katerisimaartitsisarnerni aaqqissuisuusartoq, Linda Larsen.

Suleqatigiinnii aqutsineq pillugu katerisimaartitsinermi peqataasut ilaatigut aamma ulluinnarni naapittakkaminnut attuumassuteqartut pillugit saqqummiussiffigineqarput. Sisimiuni tunisassiorfiup ingerlatsisua Hans Lars Olsenip periusissiaq LEAN-i atorlugu suleriuseq, tassalu annikinnerpaaq atorlugu maangaannartitsinanilu pisisartut pisariaqartitaannik tunniusisinnaaneq pillugu saqqummiussaqarpoq. Aamma sulisoqarnermut immikoortortoqarfimmi atorfilik Line Poulsen sulisut taarseraattarnerat aamma sulisut sulisoriuaannarnissaannut iliuuseqarneq pillugu saqqummiussaqarpoq.

Sulisut akornanni atugarissaarneq anguniarlugu qanoq iluuseqartoqarsinnaanersoq saqqummiussinerit aallaavigalugit aqutsisut akornanni oqaloqatigiinnerit pitsaasut ingerlanneqarput.

Royal Greenlandip tunisassiorfiini 37-iusuni tunisassiorfinni 13-ininngaannersut aqutsisut piginnaanillit 20-it Kangerlussuarmi katerisimaartitsinermi peqataasut suleqatigiinni aqutsineq pillugu paasisaqarlutik manna suliffimminni suleqatitik peqatigalugit ilikkakkatik aallaavigalugit angusaqassallutik aamma suliassanik inaagaqassallutik suliffimminnut utersimalerput.