Piumassusillip inuusuttut aqqutissiuuppai
Efterskolerniarlutik imaluunniit nunani allani AFS-erniarlutik 2018-imi Royal Greenlandimut aningaasatigut tapiissuteqarfigineqarnissaminnik qinnuteqartut 30-it tapiissuteqarfigineqarput. 2018-imi Royal Greenlandip aningaasatigut tapiissutai efterskolerniartunut aqqanilinnut, AFS-erniartunut 18-inut aamma oqaatsinik ilinniartumut ataatsimut tunniunneqarput. 2018-imi tapiissutinik tunineqartut ilagaat ilinniartitsisup Sofie H. Berglundip atuartitai sisamat.
Allattoq Inga Egede: ineg@royalgreenland.com- Ukiut kingulliit marluk ingerlanerini atuartut efterskoleriarniartut aamma AFS-eriarniartut aqqanillit angajoqqaavi peqatigalugit Royal Greenlandimut qinnuteqaativut akuerineqarput. 2018-ip ingerlanerani atuartitakka sisamat Royal Greenlandimit aningaasanik tapiissuteqarfigineqarput, taama oqaluttuarpoq Nuummi Nuussuup Atuarfiani ilinniartitsisoq, Sofie H. Berglund.
Atuartut kisimiittunik isertitakitsunillu angajoqqaallit Sofia H. Berglundip qinnuteqaassuttarpai
- Atuartut efterskolerusullutik imaluunniit AFS –erusullutik kissaateqartut qinnuteqaassuttarpakka. Angajoqqaat kisimiittut meeqqamik Danmarkimi imaluunniit nunani allani atuarnerini aningasartuutinut atugassaanik akissaqanngitsut Royal Greenlandimut qinnuteqaassuttarpakka, Sofie H. Berglund oqarpoq, nangipporlu:
- Inuusuttut aningaasanik taperneqarnissaannik periarfissaqarmat assut nuannerpoq. Inuusuttut efterskoleriarnissaminnut AFS-eriarnissaminnulluunniit Royal Greenlandimiit aningaasanik taperneqaraangata angajoqqaat, atuartut uangalumi qujamasuttaqaagut, inuusuttummi siunissaannut pingaaruteqarmat.
Periusissiaq tunngaviuvoq
Inuusuttut efterskolerniarlutik AFS-erniarlutik imaluunniit oqaatsinik ilinniariarniarlutik aningaasanik tapiissutinik qinnuteqaataat Royal Greenlandimi tapiissuteqartarnermut ataatsimiititaliap suliarisarpai. Tapiissuteqartarnermut ataatsimiititaliaq Naalakkersuisut nunap immikkoortuisa ineriartortinnissaannut periuserisissaat siusinnerusukkut atuuttoq tunngavigalugu tapiissuteqartarnermut aalajangersakkat naapertorlugit aningaasanik tapiissuteqartarpoq. Taamaattumik ingammik atuartunut qallunaatoornermik, tuluttoornermik, matematikkernermik pinngortitalerinermillu piginnaasaqarnerulerusuttunut tapiissuteqartarpoq.
Inuusuttut Danmarimi nunani allaniluunniit ilinniariassatillugit nalinginnaanerusaraluarpoq angajoqqaat aningaasanik tapiissutinik qinnuteqartuusartut.
- Kisianni aamma ilinniartitsisut atuartuutitik qinnuteqaassullugit qinnuteqartillugit aningaasanik tapiissuteqarfigisinnaasarpagut. Atuartut ilinniagaqartulluunniit atuartitsissutini qulaani taaneqareersuni ineriartortitsinissaminnik kissaateqarpata ilinniagaqarnissaannik aqqutissiuukkusukkatsigit tapiissuteqarfigisarpagut, taama oqarpoq Royal Greenlandimi attaveqaqatigiinnermi ingerlatsisoq, Káte Hansen. Káte Hanseni Royal Greenlandimi atorfillit marluk peqatigalugit qinnuteqaatit suliarisarpaat.
Aningaasartuutit
Aningaasanik qinnuteqarfiusinnaasunik periarfissanik angajoqqaat amerlasuut ilisimasaqanngimmata Sofie H. Berglundip atuartuutini qinnuteqaassuttarpai.
- Angajoqqaarpassuit isumaqartarput Royal Greenlandimi sulisut kisimik tapiissutinik qinnuteqarsinnaasut, taamaanngilarli.
Efterskolernerup AFS-ernerullu nalaani aningasartuutaasartut pillugit angajoqqaat ilisimasaqarpallaartanngitsut Sofie H. Berglund oqarpoq.
- Atuartut Danmarkimi efterkolernerminni nunanilu allani AFS-ernerminni sutigut aningaasartuuteqarumaarnersut angajoqqaarpassuit eqqarsaatigineq ajorpaat. Assersuutigalugu inuusuttut angalasarnernut, oqorutisiutissanik, eqaarsaarutinut, nipilersuutinut aamma cykilinut aningaasartuuteqartarput. Tamaattumik angajoqqaat qinnuteqartillugit ikiortarpakka, Sofie H. Berglund oqarpoq.
Royal Greenlandimi tapiisarnermut ataatsimiitsitaliaq ukiup ingerlanerani nuna tamakkerlugu aningaasanik katersuiniartoqartillugu tapiisarpoq, aamma Ivalo-p aamma Minik –iup aningaasaateqarfianut kiisalu Kalaallit Nunnaanni Timersoqatigiit Kattuffianut tapiissuteqartarpoq.
