Royal Greenlandimi atorfilik Canadami akissaasersugaanngitsutut konsuulinngortinneqartoq

Simon Jarding Danmarkip Canadami allartitaqarfianeersumit Niels Boel Abrahamsenimit St. John’s akissaasersugaanngitsutut konsuulinngortinneqarpoq. Tamatumunnga atatillugu Simon Jarding guvernørimut Judy Footemut illoqarfinnilu taaneqareersuni naalakkersuisunut ilisaritinneqarpoq.

- Nunagisannik kiffartuerusunnersunga aperineqarama ataqqinaatitut tiguara – atorfimmik qinnutigineqarsinnaanngitsumik innersuussutigiinnarneqarsinnaasumilli neqeroorfigineqarama misigaanga nersugaallunga, misigisarlu tamanna nuannerpoq. Taamatuttaaq Royal Greenland sinnerlugu kosuulinngortitaanera Royal Greenlandilu nunarsuarmi immikkoortortaqarfippassuisa ilaanni atsaavissuaq konsuuleqalernera usorsisimaarutigaara, Simon Jarding oqarpoq.

Periarfissatsialak

Royal Greenlandip aalisakkanik tunisassiorfiit arfinillit Newfoundlandimiittut 2015-imi pisiarimmagilli Simon Jarding Quin-Sea Fisheries Limitedimi pisortaanertut atorfeqarpoq. Tamatuma kingorna Danmarkip aallartitaqarfianeersoq Quin-Sea Fischeriesimut St. John’sinimiittumut pisortatigoortumik tikeraarpoq. Tamanna pivoq EU-p aallartitaqarfianeersut St. John’s-imi 2016-imi katerisimaarmata. Tamatuma kingorna Simon Jardingip Danmarkip Ottawami aallartitaqarfianeersoq taamatuttaaq Danmarkip Torontomi niuernermik ingerlatsivianeersut atassuteqarfigisarpai.

- Danmarkip Canadami aallartitaqarfianeersup Niels Boel Abrahamsenip 2017-imi attavigimmanga aperaanga Danmarkip Newfoundlandimi Labradorimilu aallartitaqarfia sinnerlugu konsuulinngorusunnersunga aamma konsulaateqarfik Royal Greenlandip St John’sip immikkoortortaqarfianit allaffissornikkut ingerlanneqarsinnaanersoq. Royal Greenlandimi pisortaaneq Mikael Thinghuusilu oqaloqatigillatsiareerluta isumaqatigiippugut uannut neqeroorutigineqartoq Royal Greenlandimut uannullumi periarfissatsilaasoq.

Tamatuma kingorna nunanut allanut ministereqarfiup Droninngillu kosuulinngortitaanissannut akuersissuteqarnissaat sivisuumik utaqqimaarparput.

Kosuulip suliassai suuppat?

- Akissaasersugaanngitsutut konsuulip Danmarkip Ottawami aallartitaqarfiani suliassat naammassisassat suliarineqarnissaannik qulakkeerinninnissaq pingaarnertut akisussaaffigaa. Suliassat Danmarkimi, Kalaallit Nunaanni Savalimmiunilu innuttaasut ajornartooraangata akunnermiliuttuusussaavoq. Ajornartoornerit ajornartoortut St. John’simut aallartitaanerannik kinguneqartumik kilisaammi umiarsuarmiluunniit ajortoornerniit utaqqiisaagallartumik passitaarnissaq imaluunniit nunani tamalaani atorneqarsinnaasumik biilernermut allagartartaarnissaq pillugit saaffiginninnernut tunngasuusinnaapput, akissaasersugaanngitsutut konsuulinngortitaaqqammertoq aamma aaqqissuussani pisortatigoortuni kiisalu Danmarkimeersunik pisortatigoortumik tikeraartoqarnerni peqataasalerumaartussaq oqaluttuarpoq. Simon Jarding isumaqarpoq, akissaasersugaanngitsutut konsuulinngortitaanera Royal Greenlandimut nersorinninnerusoq.

- Isumaqarpunga, Royal Greenlandimut nunani assigiinngitsuni ingerlatsiviusumut nersorinninneq Kalaallit Nunaaanni, Danmarkimi nunanilu allani tusaamaneqarluarnerulernissaanut tunngaviussasoq. Royal Greenland aamma Royal Greenlandip atorfilittaminik nunarsuarmi immikkoortortaqarfippassuisa ilaanni konsuuleqalernera usorsisimaarutigissavarput. Suliffeqarfiit atorfilittaminnik konsuulillit ikittuararsuupput, Royal Greenlandillu konsuuleqarnera Kalaallit Nunaanni, Savalimmiuni Danmarkimilu susassareqatigiinnut nittarsaassinerup tungaatigut periarfissatsialarujussuuvoq. Konsuulinngornera ilutigalugu politikerinut nalinginnaasumik ajornarnerusumik attaviginiarneqartartunut ajornannginnerulissaaq, Danmarkip St. John’simi aallartitaqarfia sinnerlugu akissaasersugaanngitsutut konsuuli Simon Jarding oqarpoq.

Simon Jardingip St. John’s-imi konsulitut toqqagaaneranut atatillugu Newfoundlandip Labradorillu guvernørianut Judy Footemut ilisaritinneqarpoq. Danmarkip Canadami ambassadøria, Niels Boel Abrahamsen assimi aamma takuneqarsinnaavoq.

St. John’s-imi Danmarkip konsulitaavata Simon Jardingip Canadami Danmarkip ambassadøria assiliseqatigaa.