Saattuni nalliuttorsiortoq nalliussineqarpoq
Saattormiu 41-nik ukiulik Arne Zeeb Royal Greenlandip Saattuni tunitsiviani sulinermini 2018-imi ataasinngorneq juunip sisamaani ukiunik 25-nngortorsiorluni nalliuttorsiorpoq. Arne Zeeb nalliuttorsiornerminut atatillugu allagartamik nersornaatisiamik Naalakkersuisut siulittaasuannit Kim Kielsenimit atsiukkamik tunineqarlunilu tunniusimalluarluni ukiuni 25-ni sulinerminut atatillugu Royal Greenlandimit aningaasanik kajumissaaserneqarpoq.
Allattoq Inga Egede- Royal Greenlandip Saattuni tunitsiviani sulininnut atatillugu ukiunik 25-nngortorsiorlunga nalliuttorsiornima nalliussineqarnera usorsisimaarutigalugulu nuannaarutigaara, Arne Zeeb qatanngutini, angajoqqaani suleqatinilu peqatigalugit kaffimik, tiimik kaaginillu sassaalliinertalimmik suliffimmini nalliussineqartoq oqarpoq.
- Ilaquttama suleqatimmalu peqataaffigisaannik nalliuttorsiornera suliffinnit nalliussineqarmat qujanarpoq.
Arne Zeeb tunitsiviup tunisinermut immikkoortortaani kranilerisutut ulluinnarni sulisartoq 16-iinnarnik ukioqarluni Saattuni tunitsivimmi sulilerpoq.
- Sulinermi atukkavut ukiut 25-t ingerlaneranni malunnartumik pitsaanerulerput. Taamanikkut sulilerama aalisartut aalisagartaannik taamaallaat tunisititsillutalu tunisaat qerinasuartittarpavut. Massakkut teknikkikkut atortorissaarutivut pitsaanerujussuupput aamma tunisat nioqqutissatut naammasseriikkatut tunisassiarisarpavut. Taamaammat tunitsivimmi sulineq oqinneerarsuanngornikuuvoq. Taamakkaluartoq suliassarpassuaqartaratta sapaatip-akunneranut ulluni arfinilinni sulikkajuttarpunga, sulinermini ukiunik 25-nngortorsiorluni nalliuttorsiortoq taamatuttaaq sumiiffimmut allamut nuunnissaminik allamiluunniit sulilernissaminik pilersaanngitsoq oqarpoq.
- Ilimagaara tunitsivimmi suli ukiorpassuarni sulissallunga, Arne Zeeb oqarpoq.
