Royal Greenland Nordic Marine Nutrition-imut aningaasaliivoq
Royal Greenlandip saarullinnik raajanillu tunisassiornermi saniatigut pisanik sinnikunillu atorluarnerunissaq suliffeqarfissuullu qeqqussanik naatitsinermik misileraaneranut atatillugu suliniuteqarnerup annertusarnissaanut atatillugu Nordic Marine Nutrition-imi piginneqatigiiffimmi aktiaatinik amerlanerussuteqalerpoq.
Royal Greenlandip qeqqussanik tunisassiornermi piginnaasat annertusarniarlugit Nordisk Tang 2020-ip aallartinnerani suleqatigilerpaa. Nordic Marine Nutrition siornatigut Kristian Ottesen siuttoralugu Nordisk Tangimit pigineqarpoq, taamaalillunilu Kristiaammik suleqateqarneq Nordic Marine Nutritionimi pisortatigoortumik isumaqatigiissutigineqaqqippoq. Nordic Marine Nutrition suleqatigiilersuni qeqqussat pillugit ilisimasanik pilersuisuuginnassanngilaq, aammali saniatigut pisanik sinnikunillu atorluaanermi misilittakkanik pisinnaasanillu annertuunik pilersuisuussaaq.
Suliffeqarfissuarmi ilisimasat nutaat
Royal Greenlandimi saniatigut pisanik ukkataqarnerulerneq ingerlaavartumik eqqarsartariaaseqarnermut ilaaginarpoq, tassani aalisakkanik qalerualinnillu naleqalersitsineq ataavartumik sulissutigineqartarluni.
Thomas Meiner Jensen, suliffeqarfissuarmi pisiortornermi ingerlatsisoq, oqaluttuarpoq;
Nordic Marine Nutrition saniatigut pisat pillugit annertuumik ilisimasaqarpoq – tassanilu ingammik ilaatigut uumasunut nerukkaatissat pillugit suliniuteqarsimapput. Piginnaasaat atorlugit saniatigut pisat pillugit nammineerluta suliniutigut annertusarsinnaallugillu taamaalilluta naleqalersitsinerusinnaavugut. Saniatigut pisat piiakkallu unammillernartoqarput, tassani Royal Greenland suliniutinik iluanaarutinilli annertusaanissamut periarfissarsiorsinnaavoq.
Saniatigut pisanik suliaqarnermi raajat qalipaat siullertut ukkatarineqassapput, kingusinnerusukkulli saarullinniit piiakkat saarulliillu amii aamma suliarineqartalissapput. Aalisakkerinermik suliaqarfiit tamakkiisumik isigalugu tamakkulerinermut siuttuunikuunngillat, Kalaallit Nunaallu assartuineq eqqarsaatigalugu unammillernartumik inissisimavoq. Taamaammat aallartisarnermi annertussutsit naammaginartuuniassammata tunisassiornerlu ingerlalluarniassammat tunisassiorfiit assigiinngitsut paasiniaavigineqarnissaat ukkatarineqassaaq.
Kristian Ottesen, Nordic Marine Nutritionimi pisortaq oqaluttuarpoq;
Aallaqqaasiutigalugu saniatigut pisat tunisassiarineqartarnerat tamannalu suliffeqarfissuarmi naleqalersitsinissamut sunik periarfissaqarnersoq qulaajaavigissavarput. Raajat qalipaat aalisakkerinermik suliaqarfinni, ingammillu Kangiani ilaatigut mamasaatiliornermi akorineqartartutut, ilisimaneqarluaramik aallarniutissaqqipput.
Qeqqussanik siullertut kingullertullu naleqalersitsisussaq
Nordic Marine Nutritionip Royal Greenlandip qeqqussanik tunisassiornermut piginnaasai aammattaaq annertusassavai, soorlu naatitsineq aammalu naleqalersitsinermi aqqusaagassaq kingulleq, tassa tunisassianik kajuminnartunik pilersitsinissaq.
Thomas Meiner Jensen oqaluttuarpoq;
Qeqqussat uagutsinnut nutaajullutillu niuerutitut pingaaruteqarput, sutigullu tamatigut angorusutatsinnut naapertuupput. Kalaallit Nunaanni qeqqussanik naatitsinissamut ataqatigiissaarinermut atortunullu maannamut annertuumik aningaasaliinikuuvugut. 2024-mi aasap tungaanut aallarnisaassaagut, piffissamilu tassani piginnaasatta sapinngisamik annertusarnissaat pingaaruteqarluinnarpoq.
Nordic Marine Nutrition taamaalilluni qeqqussanik tunisassianik inerisaanermik suliaqarnermik nangitsisuussaaq, matumani niuerfinnik teknologeeqarnermillu aamma inerisaassalluni. Aammali suliffeqarfiup suliaqarfimmi misilittagaqarnera Royal Greenlandillu suliffeqarfimmik tunisassianillu annertusaanissamik angorusutaqarnera pissutigalugit naatitsinermik annertusaanermillu pingaarnertut suliaqassaaq.
Kristian Ottesen nassuiaavoq;
”Qeqqussanut tunngatillugu suliarisinnaasagut tassaapput mamassaanik suliaqarnerit, inuussutissanik assigiinngitsunik suliaqarnerit atuisunullu tunisassiorneq. Aammali annertuunik naatitsinissamik anguniagaqarpugut, taamaammat atuinissamut periarfissat allat soorlu akuutissatut atorsinnaasut misissorlugillu naatitsinermi isumasioqatitut inissisimallutalu ingamik naasussanik ikkussuinermik suliaqassaagut. ”
Nordic Marine Nutritionip Royal Greenlandip Nutaaliornermut Immikkoortortaa qeqqussat pillugit suliniummi, qanittumi GUPD-mit siuarsaanissamut 5,5 millioninik aningaasaliiffigineqartumi, qanimut suleqatigissavaa.
