Royal Greenland aamma Paarisa peqqinnissap siuarsarnissaa pillugu suleqatigiipput

Royal Greenland aamma Paarisa ” Ataatsimoorluta nunarput peqqinnerulersitsigu” qulequtaralugu inuit peqqinnerulernissaat siunertaralugu peqqinnissaq pitsaaliuinissarlu siuarsarniarlugit suleqatigiinnissamik isumaqatigiissusiorput. Suliniut innuttaasut peqqissuunissaannik suliniummut Inuuneritta III-mut, piffissami 2020-miit 2030-mut meeqqat ilaqutariillu peqqillutillu ilorrisimaarnissaannik ukkataqarfiusumut, ilaavoq. Suleqatigiinneq Naalagaaffiit Peqatigiit nunarsuaq tamakkerlugu ineriartortitsinissamut anguniagaasa pingajuat, Peqqinnissaq atugarissaarnerlu, aamma anguniagaasa 17-iat, Nunarsuarmi tamani peqatigiinnerit, pillugit suleqatigiinnerussaaq.

Nunatsinni peqqinnerulernissamik suliaqarneq Royal Greenlandimit pingaartinneqarpoq. Suliffeqarfiup peqatigiilluni iliuuseqarnissamik kissaateqarneranut tamanna naapertuuppoq. Suleqatigiinnissamut isumaqatigiissut peqqinnartunik nerisaqarnissamut tunngagami tamanut ilutsitsiffiusinnaavoq.

- Tunisassianik peqqinnartunik peqareerpugut, tunisassiattalu amerlanerusunit - ingammik meeqqanit inuusuttunillu - nerineqarnissaat kajumissaatigerusupparput, nunatsinni tunisassiat pillugit tuniniaanermi ingerlatsisoq Malik Hegelund Olsen oqarpoq isumaqatigiissummilu qulequtarineqartunut innersuussilluni:

• Innuttaasut aalisagartornissaannut kajumissaarlugit, nerisaqarnermi innersuussutini aalisartukulanissap akulikissusaata akulikillinerunissaa

• Ileqqut peqqinnartut pillugit ilisimasanik siammarterillunilu siuarsaanissaq

• Aalisagartornissap ajornannginnerullunilu pissusissamisoortunngornissaa

Suleqatigeereerput

Suleqatigiinnissamik isumaqatigiissut naapertorlugu qanorpiaq iliuuseqartoqassanersoq piareersarneqaleruttorpoq, sammisaqartitsinerilli ilaqutariinnut meerartalinnut tunngassasut qularnanngilaq. Tamanna Paarisamit Royal Greenlandimiillu misilittagaqarfigineqareerpoq.

- Paarisa nerisaqarnermi innersuussutinik aalisakkanik ukkataqartunik suliaqarnikuuvoq. Suliaq tapersersorumallugulu tunisassiagut atuisunut pissarsiariuminartuutikkumallugillu toqqaruminartuutikkumavagut. Tamatumunnga tunngatillugu Paarisa suleqatigalugu iganermut najoqqutassianik saqqummersitsillutalu meeqqanut tv-kkut iggavimmik isiginnaagassiornikuuvugut, Malik Hegelund Olsen oqarpoq, nangipporlu:

- Suleqatigiinnissamut isumaqatigiissusiaq tunngavigalugu meeqqat inuusuttullu aalisagartornerulersikkumallugit peqqinnerulerumalluni peqqinnartunik nerisaqarnissamut ilisimasanik siammarterillunilu siuarsaanissamut sammisaqartitsinissamut pilersaarusiussaagut. Sammisaqartitsinissagut nittartakkatigut naapittarfitsigut meeqqanut inuusuttunullu siammarterneqassapput.

Royal Greenlandip peqqinnissaq pillugu paasissutissiillunilu saqqumilaarnerunissaanik suleqatigiinnissamut isumaqatigiissut aamma pisussaaffiliivoq.

- Inuiaqatigiinni peqqinnerunissaq qaffassarniarlugu suliami pingaarutilimmi kivitseqataajumavugut. Suliniutit sammisassaqartitsinerillu assigiinngitsut tapersersorlugillu saqqumilaarnerussaagut. Sammisassaqartitsinerit ukkatarinninnerillu aallartitagut ikioqatigiinnikkut saqqumilaartinnerusinnaavagut. Piffissami sivisuumi suleqatigiinnissamut isumaqatigiissusiorpugut. Suliniutigut ataavartumik ataqatigiissaartassavagut, ukiukkaartumillu sammisassanik assigiinngitsunik anguniagaqartassaagut, Malik Hegelund Olsen oqarpoq.

Paarisa aamma Royal Greenland suleqatigiinnermi killiffik pillugu ukiut tamaasa ataatsimeeqatigiittassapput.

Ilisimaviuk:

Royal Greenland nunarsuaq tamakkerlugu ineriartortitsinissamut anguniakkat tunngavigalugit piujuartitsinissamik suliniuteqarpoq, anguniakkallu sisamat toqqarneqarput; 14 – Immami uumassusillit, 12 – Akisussaasumik atuineq tunisassiornerlu, 8 – Suliaq naammaginartoq kiisalu aningaasarsiornikkut siuariartorneq aamma 4 – ilinniagaqarneq pitsaasoq. Royal Greenland tamatuma saniatigut suleqatissanik tulluartunik anguniakkat sisamat pillugit tapersersuisinnaasunik suleqateqarnissamut isumaqatigiissusiortarpoq.