Royal Greenland nipisanniartoqarnissaanut piareersimavoq
Royal Greenlandimi nipisat suaannik tunitsiviit tamarmik ulapaartoqarnissaanut piareersimapput. Ukioq manna tunineqarsinnaasut annertussusaat 100 tonsimik qaffanneqarpoq.
Upernalerpoq, nipisanniarnissarlu tullinnguuppoq.
Ukioq manna ulapputtussaarpasippugut. Taama oqarpoq Møller Lyberth, Royal Greenlandimi ingerlatsinermut aqutsisoq.
"Ukioq manna 900 tonsit tigooqqarsinnaassavagut, siornamullu sanilliullugit 100 tonsimik annertunerussammata ulapputtussaarpasippugut", oqarpoq.
Royal Greenlandip taamaalilluni pisarineqarsinnaasut katillugit 61 %-ii tigooqqassallugit piareersimavoq.
"Pisarnertut pisareersarluarpugut, tunitsiviillu kujataani Narsamiit avannaani Qeqertarsuarmut suannik tigooqqaanissaminnut piareersarneqareerput", Møller Lyberth oqaluttuarpoq.
Suaat niuerfinni nunani tamalaaniittuni tuniniarneqartarput
Suaat Royal Greenlandip sinerissami tunitsiviinut tunineqareeraangamik Cuxhavenimut Tysklandimiittumut nassiunneqartarput.
Tassaniippoq Royal Greenlandip tunisassiorfia suannik tunisassiorlunilu igalaaminernut poortuiffiusoq. Tyskland tassaavortaaq nipisat suaannik niuerfiit annersaasa ilaat. Tassami nipisat suaasa annerpaartaat Europami tunineqartarput.
"Nipisat suaasa annerpaartaat niuertarfeqarfinnut, tassa niuertarfissuarnut Europami sumiiffinni assigiinngitsunut", tunisarpagut, Møller Lyberth oqarpoq.
Suaat Royal Greenlandimut tunineqartut tamarmik nunani allani tunineqartarput.
Royal Greenland nipisanniarneq aallartinniariartoq suannik tigooqqaanissaminut piareersimavoq, nipisanniarnerullu maajip naajartornerani naammassinissaa naatsorsuutigineqarpoq.
