Kilisaat nutaaliaq sananeqassaaq

Royal Greenlandip kilisaataatini 2019-imili ataavartumik nutaaliaanerusunik taarsersorpai. Taamaalilluni tunisassiorsinnaassuseq, aalisarsinnaassuseq, nalimmassarsinnaassuseq qaffallunilu silaannarmut sunniuteqarneq annikinnerulissaaq, taamatuttaarlu kilisaatini inuttat pitsaanerusumik atugassaqassapput.

Kilisaatit sanatitat nutaat tallimaat maanna inniminnerneqarpoq. Lars Nielsen, Royal Greenlandimi tunisassiornermut pisortaq taama oqaluttuarpoq.

- Kilisaatissamik inniminneeqqinnerput nuannaarutigalugu oqaatigisinnaavarput. Kilisaatit nutaat ilaqqinnerisigut aalisarnerput pitsanngornerussaaq, soorlu aamma orsussamik atorluaanerullunilu inuttatsinnut pitsaanerusumik atugassaqarfiujumaartoq, Lars oqarpoq.

Umiarsualiorfik Spaniap avannaaniittoq Astilleos De Murueta kilisaatiliussaaq. Umiarsualiorfiup taassuma kilisaatit nutaat siulliit sisamat aamma sananikuuai.

Tamanna arlalinnik peqquteqarpoq, Lars Nielsen nassuiaavoq.

- Kilisaataatigut sisamat, Sisimiut, Avataq, Nataarnaq aamma Tuugaalik iluarisimaaqaagut, taamaammallu Astilleros De Murueta suleqatigeqqinniarparput. Tamatumunnga atatillugu ilusilersuinerit kilisaatilioriaatsillu siornatigut atorneqareersut atoqqissinnaagatsigit taamaalilluta akia appasinnerutissinnaavarput, Lars oqarpoq.

Tuugaalik nutaaq 2023-ip aallartinnerani tunniunneqassaaq.

Akamalik tuniniarneqassaaq

Kilisaat nutaaq Akamalimmik ateqartussaq 2025-mi atulerneqassalluni naammassisussatut naatsorsuutigineqarpoq. Taassuma Akamalik maanna kilisaataatigineqartoq 2001-imililu atulersoq taarsissavaa.

- Akamalik suli atorluarsinnaasoq taarserutsigu akimik pitsaasumik akilerlugu tuniniarsinnaavarput, tunineranilu iluanaarutit kilisaammut nutaamut aningaasartuutit ilaannut matussutigisinnaavagut, Lars Nielsen nassuiaavoq.

Akamalik 82,3 meterinik takissuseqartussaq 2950 m3-inik useqarsinnaallunilu, 15 knobimik sukkassuseqarlunilu inuttanut 30-inut inissaqassaaq.

- Aalisarneqartut kiiluugaangata Royal Greenlandip CO2-mik aniatitsinera annikillissammat aningaasaqarnikkut pissarsiffiullunilu avatangiisimut sunniutikinnerussaaq, Lars Nielsen oqarpoq.

Akamalik nutaaq Akamalitoqaq assigalugu raajarniutaassaaq.