Royal Greenland nunarsuarmi niuerfinni akinut malinnaavoq
Nunarsuarmi saarullinnut pisassiissutit 60 %-ii Barentip imartaaniipput, pisassiissutillu taakku affai Ruslandimit aalisarneqarput. Ruslandimi aalisakkat akii 30%-inik apparsimapput, tamatumalu kingunerisaanik nunarsuarmi niuerfinni akit sunnerneqarput.
Europami niuerfimmi saarulliit Ruslandimeersut akiisa 30%-it missaannik apparnerisa malitsigisaannik saarullinnik tunisinermut aki apparpoq. Saarulliit akii piffissami juuni 2022-miit septembari 2023-mut Europami, USA-mi Kangianilu appariartorput. Tamatuma malitsigisaanik saarulliit nunarsuarmi tamarmi aalisarneqartut pingajorarterutaat akimikkut appariaateqarsimapput, tamannalu nunarsuarmi saarullinnut niuerfimmi akit ineriartornerannut sunniuteqanngitsoorsinnaanngilaq.
Nunarsuarmi niuerfiit pissaanerat
Nunarsuarmi saarullinnut pisassiissutit 2%-ii nunatta pigivai (Nunatta Kitaani sinerissap qanittuani pisassiissutit), tassa imaappoq Royal Greenlandip suliffeqarfittut nunarsuarmi tamarmi inissisimanera annikitsuaraavoq. Nunarsuarmi saarullinnut pisassiissutinik annikitsuinnarnik pisassaqarnerup malitsigisaanik, suliffeqarfissuaq nunarsuarmi niuerfinni akit ineriartornerinut pingaarutilimmik inissisimanngilaq. Nunarsuarmi tamarmi annikitsuaqqatut inissisimaneq peqqutigalugu Royal Greenland taamaalilluni niuerfinnik akinik malinnaasariaqarlunilu suliffeqarfittut akisussaassusilimmik niuertariaqarpoq.
Sinerissap qanittuani saarullinniarneq Royal Greenlandip pingaarnertut aallutaasa ilagaat, taamaammat ingerlatseqatigiiffittut nunarsuarmi niuerfinni pissutsinit sunnerneqarneq pinngitsoorneqarsinnaanngimmat suliffeqarfiup tunisinermi akimik appaanera niuerneq eqqarsaatigalugu iliuutsitut akisussaassusilittut nalilerneqarpoq.
Paasissutissat
Paasissutissat
Saarullinnut Nutaaq-tut tunisassianut (saarulliit uumasut) tunisinermi aki suli allanngornanilu piffissaq aalisarfiunerpaasoq naallugu allanngorsimanngilaq.
Tunisinermi akit appariartortut
Royal Greenlandip nunarsuarmilu niuerfiit sinnerisa saarulliit aatsaat taamak qaffasitsiginerat 2021-mi misigaat, kisiannili 2022-miit ulloq manna tikillugu tunisinermi akit appariartorsimapput.
Takussutissami ataani ersersinneqartutut Royal Greenlandip aallutaanut pingaarnernut saarullinnut (saarulliit niaquerlugillu erlaviikkat) tunisinermi akit 2023-mi 30%-inik apparsimapput.
Naak tunisinermi akit appariartoraluartut Royal Greenlandimut tunisat 2023-mi ukiup siulianut sanilliullugu 3000 tonsinik amerlanerupput. Tassa imaappoq maannamut 2023-mi tunisat nalingi 24 mio. koruuninik amerlanerupput – aningaasallu taakku nunatsinni aalisarnermut iluaqutaassapput.
Paasissutissanut sukumiinerusunut Tunisassiornermi Pisortaq Lars Nielsen +45 22 24 83 62-mut sianerfigalugu attavigineqarsinnaavoq.
