Royal Greenlandip kilisaatitaava atertaartinneqalerpoq
Royal Greenlandip kilisaataataa nutaaq M/tr Sisimiut pingasunngornermi aggustip 14-iani nalunaaqutaq ataatsimut Umiarsualivimmi atertaartinneqassaaq. Royal Greenland A/S-imi pisortaaneq Mikael Thinghuus qaaqqusanut tikilluaqqusissaaq, kingornalu umiarsuamik atertaartitsisussap umiarsuaq atsissavaa. Tulliullugu umiarsuarmi takornariartitsisoqassaaq, qaaqqusanullu sutugassaqarumaarpoq. Nalunaaqutaq pingasuniit tallimat tungaanut M/tr Sisimiut tamanut takornariarneqarsinnaassaaq.
Royal Greenlandip kilisaataataa nutaaq siunissami aalisarnissamut tulluarsagaavoq – Kalaallit Nunaata siunissaanut. Atlantikup avannarpasissuani nunallu avannarliit imartaanni aalisarnissamut tulluarsagaavoq atortorissaarutinillu nutaalianik ulikkaarluni, taamaammat inuttanut suliffigissallugu nutaaliaallunilu pitsaalluinnartuuvoq.
Kilisaat teknologiimut tunngasunik atortulersorluagaavoq, tunisassiornerullu naammassiuminarsagaanerata tunisassiorneq sukkanerulersillugulu naapertuunnerulersippaa. Tunisassiat tamarmik qeritinneqannginnerminni pallitsinut iliorarneqareertarput.
Kilisaatip timitaa sukkasuujunissamut, aalisariaatsinut assigiinngitsunut aamma imaqqortussusermut tulluarsagaavoq. Aalisarfinnut avinngarusimasunut sukkasuumik apuussinnaaneq, aalisarluarsinnaaneq, immami tunisassiorneq, avatangiisinut mingutsitsinani tulaqqasinnaaneq assersuutigalugu orsussamik atuinerup minnerpaaffissaaniitillugu naammassisinnaajumallugit umiarsuup aquttarfia ilusilersoqqissaagaavoq.
Immap pissarititaasa atorluarneqarnissaat ilusilersuinermi pingaarutillit ilaattut ukkatarineqarpoq. Tamanna peqqutigalugu tunisassiorfik perlukut saniatigullu pisat tamaasa niuernikkut akilersinnaaqqullugit aalisakkat perlukuinik qajuusiorfimmik aalisakkallu orsuannik uulialiortarfimmik pilerneqarpoq. Aammattaaq nukissamik atuineq minnerpaaffissaminiitinniarlugu atortunillu avatangiisinut mingutsitsisunik kuutsitsinissaq pinaveersaarniarlugu arlalinnik suliniuteqartoqarpoq.
Kilisaat inuttat ukiup affaa angerlarsimaffigisarmassuk pequtsersornera atoruminartuunissaalu ilusilersuinermi pingaartinneqarpoq. Atortussanik toqqaanerup, qalipaatilersuinerup ineeqqallu ataasiittarisaanissaasa pingaartinneqarnerisa kilisaat najoruminartuutippaat.
