Royal Greenland pisortaanermik atorfinitsitsivoq
Susanne Arfelt Rajamand 2023-mi februaarimi Royal Greenland A/S-imi siuttuulissaaq.
Susanne Arfelt Rajamand ukiuni 15-ini Kangiani inuussutissarsiornermik suliaqareerluni Royal Greenlandimi pisortaaninngornissaminut akuersivoq. Immussualiorfissuup Fonterrap Kangiani immikkoortortaqarfiani, ingerlatseqatigiiffimmi 2500-nik amerlanerusunik sulisulimmi, pisortatut siornatigut atorfeqarsimavoq.
Susanne Arfelt Rajamand illup iluani atortussanik tunisassiorfissuarmi Unileverimi atorfeqarsimavoq, tassani ilinniartutut aallarteriarluni Singaporemi pisortanngorpoq.
- Susanne nunatsinni suliffeqarfiit pingaarnersaanni siuttuussalluni tunuliaqutaqarlunilu, nunani tamalaani misilittagaqarlunilu piginnaasaqarpoq. Royal Greenlandip nunatsinni ineriartortinneqartuarnissaanut nunanilu tamalaani aallussinermik ukkatarinninnermik attassiinnarnissaanut qulakkeerinneqataassaaq, Maliina Abelsen, Royal Greenlandimi siulersuisut siulittaasuat, oqarpoq.
Royal Greenland nunarsuarmi siuttuussaaq
Royal Greenlandip periusissatut pilersaarutaa North Atlantic Champion naapertorlugu nalitusaaneq ukkatarineqassaaq. Nerisassanik immameersunik, soorlu raajanik issittup imertaaneersunik, qaleralinnik saattuanillu tukertitaanngitsunik Atlantikup Avannaaneersunik nunarsuarmi pilersuisuni siuttuunissaq anguniagaavoq.
Royal Greenland Kangiani, aammali Amerikami Avannarlermi kiisalu Europami tuniniaanermik annertusaanikkut siuariartuinnarpoq.
- Royal Greenland Kalaallit Nunaata tamarmi suliffeqarfiutigaa, Royal Greenlandillu nunatsinni inerisarneqarnissaa pimoorullugu ukkataraarput. Taamaaliussagutta nunani tamalaani aallussinerput attatiinnartariaqarlugulu niuerfinni tunisassiatsinnik piumallutik akiliilluarsinnaasuni tuniniaanerusariaqarpugut. Taamaammat Susannep misilittagai pisariaqartippagut, Maliina Abelsen, siulersuisunit isumaqatigineqartoq, oqaluttuarpoq.
Susanne Arfelt Rajamandip Mikael Thinghuus, Royal Greenlandimi ukiuni aqqaneq-marlunni pisortaaneroreerluni oktobarimi soraartoq, paarlassavaa.
- Qinnuteqartumik taama nunani tamalaani misilittagaqartigisumik soqutiginnittoqarsinnaagatta tulluusimaarutigaarput. Susannep nunani tamalaani angusaqarsinnaanini ukiorpassuarni uppernarsartuarpaa, taannalu siuttoralugu ingerlatseqatigiiffiup ajunngitsumik ineriartornerata attatiinnarnissaa qilanaaraarput, Maliina Abelsen oqarpoq.
Susanne Arfelt Rajamand qullersaqarfimmi Nuummiittumi 2023-mi februaarip aallaqqaataani sulilissaaq.
- Royal Greenlandimi sulilernissara qilanaaraara. Suliassaq maniguullunga tigussavara. Sulisut siulersuisullu peqatigalugit Royal Greenlandimi angorusutat angusinnaagigut isumaqarpunga, Susanne Arfelt Rajamand oqarpoq.
Susanne Arfelt Rajamand pillugu
Susanne Arfelt Rajamand Royal Greenland A/S-imi pisortaaninngussaaq.
Susanne Arfelt Rajamandip ilinniagai atorfigisimasailu pillugit uani paasisaqarnerusinnaavutit.
Susanne Copenhagen Business Schoolimi cand.merc.-itut ilinniarsimallunilu Tsinghua University Beijingimiittumi INSEAD-imilu Executive MBA-tut naammassinikuuvoq. Ukiut kingulliit 15-it Singaporemi najugaqarsimavoq.
Susanne danskisut oqaaseqarnermi saniatigut tuluttut, spanskisut tyskisullu oqalussinnaallunilu svenskisut franskisullu isumaqatiginninniarsinnaavoq.
Nunani tamalaani sulinera Unileverimi aallartippoq, tassanilu ingerlatsinermi ilinniartutut 2003-mi Danmarkimi aallartikkami 2015-imiit 2017-imut Singaporemi ingerlatsinermut pisortatut atorfeqareerluni taamatuttaarlu sulinermini ineriartornerminut atatillugu Sverigemi Hollandimilu aamma sulereerluni soraarpoq.
Susanne Unileverimi atorfeqareernermi kingorna inuussutinik tunisassiornermut suliffeqarfimmi McCormick & Companymi atorfinippoq, tassanilu Kangiani (Kina minillugu) nunanilu Manerassuup nalaaniittuni akussanik niueruteqarneq akisussaaffigilerpaa, matumani tunisassiorfiit sisamat piginneqataallunilu ingerlatseqatigiiffiit sisamat 800-nik amerlanerusunik sulisullit akisussaaffigai.
Susanne immussualiorfissuarmi Fonterrami New Zealandimiittumi 2020-mi annertuumik akisussaaffeqalerpoq, tassani Kangiani niuertarfeqarfinnut igaffissuaqarfinnullu tuniniaaneq tamaat, matumani aamma tunisassiorfiit sisamat ingerlatseqatigiiffillu 2500-nik amerlanerusunik sulisulik akisussaaffigai.
