Royal Greenlandimi aqutsisoqatigiit patajaannerusut suliffeqarfik siunissamut piareersassavaat
Royal Greenlandimi suliffeqarfissuaq tamakkerlugu pissutsit allanngujaallisarniarlugit patajaallisarniarlugillu nunatsinni pisortatut atorfinnik nutaanik marlunnik pilersitsinikkut suliffeqarfissuarmi aqutsisooqatigiit nutarsaavigineqarput.
Aaqqissuussaanermi nutaami suliffeqarfissuarmi aqutsisoqatigiit, tassa pisortaaneq pisortallu tallimat
ataatsimoorlutik suliffeqarfissuarmik aqutsissapput:
- Pisortaaneq Susanne Arfelt Rajamand
- Aningaasaqarnermut pisortaq Nils Kinnerup
- Tunisassiornermut pisortaq Lars Nielsen
- Sulisoqarnermut attaveqatigiinnermullu pisortaq – nunatsinni atorfik nutaaq
- Nittarsaassinermut piujuartitsinermullu pisortaq – nunatsinni atorfik nutaaq
- Tuniniaanermut pisortaq – akisussaaffeqarfiit allanngortillugit inuttassarsiuuteqqitaq
Aqutsinikkut allanngujaallisaaneq suliffeqarfissuarmilu inerisaaneq
Pisortaanerup Susanne Arfelt Rajamandip ineriartortitsineq nuannaarutigaa:
’Inuit suliffeqarfimmi sulisut taamatuttaarlu aalisakkanik qalerualinnillu pissarsiarisinnaasatsinnik tamakkiisumik aqutsineq Royal Greenlandimi pisuussutit pingaarnersaraat. Nunatsinni aqutsineq patajaannerusoq niuerfinnullu nunani tamalaaniittunut toqqaannartumik atassuteqartoq Royal Greenlandimi assigiinngiiaartunik aallussaqarnermi ilisimasanik paaseqatigiinnermillu annertusaassaaq’.
Suliffeqarfissuup aaqqissuussaanerata nutarsarneqarneratigut nunatsinni ingerlatsineq suliffeqarfissuup nunani tamalaani ingerlatsiviinut toqqaannartumik atassuteqartoq patajaannerulissaaq taamatuttaarlu suliffeqarfissuarmi ingerlatsivinni tamani qanimut suleqatigiinnermut sinaakkusiillunilu nunat killii atorfiillu akimorlugit patajaannerulerlunilu ataatsimoorussinermik pilersitsissaaq.
Akisussaaffeqarfiit nutaat pingasut pilersinneqarnerinut tunngavilersuutit
Sulisoqarnermut attaveqatigiinnermullu pisortaq:
Royal Greenlandimi sulisut 2.300-it missaanniittut 60%-ii sinnerlugit nunatsinni, suliffeqarfiup qullersaqarfigisaani, sulisuupput. Sulisunik aqutsineq, ilinniartitsineq piginnaanngorsaanerlu Royal Greenlandimi aallussat pingaarutillit ilagaat, soorluttaaq suliffeqarfiup iluani avataanilu sulisunik, piginnittunik kiisalu nunatsinni nunattalu avataani soqutigisaqartunik attaveqarneq suliffeqarfiup ingerlalluarnissaanut pingaaruteqarluinnartut.
Attaveqarnermut sulisoqarnermullu pisortaq Jens K. Lyberth sulisoqarnermut, attaveqatigiinnermut piujuartitsinermullu akisussaasuuvoq. Jens K. Lyberth ukiut qulit sinnerlugit Royal Greenlandimiissimavoq, taamatuttaarlu nunatsinni politikkimik allaffissornermillu ukiorpassuarni sulisimanermini misilittakkani inuttullu piginnaasani atorlugit akisussaaffeqarfini annertuumik kivitseqataaffigalugulu najukkami aqutsineq, nunami immamilu atorfinni assigiinngitsuni piginnaanngorsaanerlu annertusaaffigilluarsimavai. Jens K. Lyberth 2024-mi januaarip aallaqqaataaniit sivikinnerusumik sulisalissaaq, tassanngaanniillu suliffeqarfissuarmi aqutsisunut siunnersortaaninngussagami aaqqissuussaanermut nutaamut nuukkiartuaarnermi Royal Greenlandimut ikiuutaalluassaaq.
Jensip aqutsinerata nalaani suliaqarfiup ineriartorsimanera tunngavigalugu suliffeqarfissuarmi aqutsineq sulisoqarnermut attaveqatigiinnermullu atorfimmik nukittuumik peqarnissaa naapertuummat pisortaaffik Sulisoqarneq Attaveqatigiinnerlu nunatsinniit aqunneqartussaq, tuluttut People & Communication-imik taaneqartoq, pilersinneqarpoq.
Nittarsaassinermut piujuartitsinermullu pisortaq:
Piujuartitsineq tunngavigalugu aallussineq Royal Greenlandip ingerlatsineranut siunissamilu ingerlalluarnissaanut pingaaruteqarluinnarpoq. Ingerlatsinerup aallussinerullu piujuartitsinermik tunngavilimmik ingerlanneqarnissaannut ikaarsaarnermi suliaqarfiit attuumassuteqartut ilaatigut kilisaateqarfik tunisassiorfiillu suleqatigalugit nunatsinniit ingerlanneqarput. Aqutsisoqatigiit nunatsinni inissisimanerat taamaammat pissusissamisoorpoq. Niuerfinni malinnaalluni, pisisartut pisariaqartitaannik paasiniaalluni suliffeqarfiullu nittarsaassineranik tunisassiornermillu ulluinnarni suliaqarnerit niuerfinniiginnassapput.
Tuniniaanermut pisortaq:
Nunani tamalaani tuniniaanermik, pissuseqatigiiaanik nioqqutissanillu piareeriikkanik niuerfinnut tunisaqarfiunerpaasunut nassiussuinermik suliaqarnermi pisisartunik qanimut attaveqarneq niuerfinnullu qanittumik inissisimaneq pisariaqarput.
Suliffeqarfissuarmi tuniniaanermut pisortaq Bruno Olesen 2010-mili Royal Greenlandimi annertuumik suliniuteqarsimasoq suliffeqarfiup nioqqutissaataanut pissuseqatigiiaanullu aallussatsinnut pingaarnertut nunatsinneersunut allannguinermut suleqataasimavoq. Bruno Olesen 2024-mi januaarip aallaqqaataani soraarninngorluni pisortaajunnaassaaq. Bruno Olesen angusarpassui Royal Greenlandillu tuniniaaneranik piorsaaqataanera pillugu qutsavigingaarparput.
Nunani tamalaani tuniniaanermut tunisassianillu immikkoortukkaalerinermut akisussaaffik aammattaaq maannamiit nunami niuerfimmiilissaaq, suliffeqarfissuarmilu aqutsivik Nittarsaassineq & Piujuartitsineq aqqutigalugu siunissami ungasinnerusumi tuniniaanermik aallutaqarneq pitsaanerpaamik qulakkeerneqassaaq.
Inuttassarsiuussineq aallartinneqarpoq
Sulisoqarnermut Attaveqatigiinnermullu pisortatut, Nittarsaassinermut Piujuartitsinermullu pisortat kiisalu Tuniniaanermut pisortatut atorfiit 2023-mi ukiap ingerlanerani inuttassarsinissaat naatsorsuutigineqarpoq. Inuttassarsiuussineq pisortassarsiornermut ingerlatsivik Spencer Stuart suleqatigalugu ingerlanneqarpoq.
SIulersuisuni siulittaasup Maliina Abelsenip allannguineq pitsaasutut isigaa:
’Royal Greenland suliffeqarfiuvoq nunatsinnut tamarmut pingaaruteqarluinnartoq. Suliffeqarfik nunani tamalaani immikkoortortalik tamatta tulluusimaarutigisinnaasarput. Pisortaanertut atorfinittoq kingulleq Susanne Arfelt Rajamand nunani tamalaani atorfeqarnermik misilittagaqarpoq. Susanne aqutsisooqatigiinnik nukittuunik, Royal Greenlandip nunatsinni aammali nunani tamalaani aallussineranik ataatsimoorussamik patajaallisaasinnaasumik, pilersitsisinnaanera upperaarput.
