Sulisoqarnermut Attaveqatigiinnermullu pisortanngortoq
Bodil Marie Damgaard suliffeqarfissuarmi aqutsisooqatigiit ilaattut Royal Greenland A/S-imit atorfinitsinneqarpoq.
Royal Greenlandip siornatigut nalunaarutigineqareersutuut nunatsinni marlunnik pisortaatitaqarnikkut aqutsisoqarfimmik nutaamik pilersitsinermigut suliffeqarfissuarmi piorsarsimassuseq attatiinnarumallugulu patajaallisarpaa.
Bodil Marie Damgaard Sulisoqarnermut Attaveqatigiinnermullu pisortatut atorfiit marluusut aappaanni atorfinitsinneqartoq taamaalilluni suliffeqarfissuarmi pisortaaqataalissaaq.
Misilittagaqarluarpoq
Bodil Marie ilinniakkani aamma Mittarfeqarfinni Sulisoqarnermut Pisortaasimanini, Nalik Venturesimi pisortaasimanini kiisalu Air Greenlandimi siulersuisuni siulittaasuunini tunngavigalugu ingerlatseqatigiiffimmi ineriartortitsinermut tunniussassaqarluarpoq.
- Suliffeqarfimmi soqutiginarluinnarlunilu nunatsinni pingaarutilimmi nutaanik misilittagaqalernissara taamatuttaarlu piginnaasakka misilittakkakkalu naapertorlugit tunniussaqarnissara qilanaaraara. Royal Greenland aqutsinermik, ilinniartitsinermik piginnaanngorsaanermillu pimoorussilluni suliaqareerpoq, suleqataalernissaralu qilanaaraara, Bodil Marie oqaluttuarpoq.
Bodil Marie Roskilde Universitetimiit suliffeqarfiit pillugit bacheloritut aamma attaveqatigiinneq pillugu kandidatitut ilinniagaqarpoq. Atorfeqartarnermi saniatigut ilaatigut aamma sulisoqarneq pillugu inatsiseqarneq, siuarsaalluni aqutsineq aamma naatsorsuutinik misissueqqissaarneq pillugit ilinniaqqillunilu siulersuisuni inissisimasarsimavoq.
Suleqatigiinnissaq qilanaaraa
Sulisunik aqutsineq, ilinniartitaaneq piginnaanngorsaanerlu Royal Greenlandimi aallunneqarput, soorluttaaq suliffeqarfiup iluani avataanilu sulisunik, piginnittunik kiisalu nunatsinni avataanilu soqutigisalinnik attaveqateqarneq suliffeqarfiup ingerlalluarnissaanut pingaaruteqarluinnartut.
Pisortaanerup Susanne Arfelt Rajamandip Bodil Mariep suleqatiginissaa qilanaaraa:
- Bodil Mariep suleqatiginissaa qilanaaraarput. Suliffeqarfimmi Atlantikup Avannaata imartaanit pisuussutit aalisarsinnaasatta nungusaataanngitsumik nalitusarnerisigut piginnittutsinnut inuiaqatigiinnullu iluaqutaasumik tamakkiisumik ingerlataqartumi aqutsisooqataassaaq. Royal Greenlandip pingaarutilittut tutsuiginartutullu aallussisutut Kalaallit Nunaanni avataanilu inissisimanerata ersarinnerulernissaa pingaartikkatsigu inuit pikkorissut immami nunamilu atorfinni soqutiginartuni atorfininnissaannut ataannarnissaannullu kajumilersikkumavagut, Susanne Arfelt Rajamand oqaluttuarpoq.
Bodil Marie 2023-mi oktobarip 16-iani sulilissaaq.
