#5: Narsamut tikeraarneq
Royal Greenlandip nunatsinni tunisassiorfeqarfiini kujasinnerpaami, tunisassiorfiutitsinni minnerpaat ilaat pingasunik ukioq naallugu sulisartunik sulisoqartoq, ulapaarfiulli nalaani 30-t angullugit sulisoqartartoq Narsami inissisimavoq. Tunisassiorfik Narsamiittoq mikigaluarluni Royal Greenlandip aallussineranut pingaaruteqarpoq.
Tunisassiorfimmi saarulliit, qalerallit, suluppaakkat, ammassaat qeeqqallu ukioq naallugu tigooqqarneqartarlutillu nipisaqarnerani nipisat suaat tigooqqarneqartarmata tunisassiorfik nunatta kujataani aalisartunut pingaarutilittut inissisimavoq.
Narsami tikilluaqqusaaneq
Narsamut tikikkatta tunisassiorfimmi ingerlatsisoq Niels Sakariassen suleqataalu naapipagut. Niels tunisassiorfimmi ukiuni 27-ni sulinikuuvoq, nunattalu kujataani raajarniarneq saarullinniarnerlu pileruttormata tunisassiorfillu 140-nik sulisoqarallarmat sulilerpoq. Taamanimiit imaq kissarnerulermat raajat avannarpartersimapput, tunisassiorfiillu aamma nuutinneqarput. Piffissap ilaani saarulleqanngilaq, ukiunili makkunani nunatta kujataata kangerluinut utersaaraluttualermat aalisakkat amerliartuinnartillugit pisassiissutit qaffakkaluttuinnarnissaat naatsorsuutigineqarpoq.
Aningaasaliisoqarneratigut nutaanik periarfissaqalerpoq
Aalisakkat qaqerlaat pitsaassusaat qaffasissoq pigiinnarniaraanni qaqinneqariartut qerinasuartinnissaat pingaaruteqarpoq. Taamaammat ingerlaartitsilluni qerinasuartitsissummik aalisakkanillu poortuivimmik nutaamik kiisalu nipisat suaannik saliivimmik taratserivimmillu 2023-mi aningaasaliisoqarpoq. Atortunut nutaanut aningaasaliinerit qerisuuteqarsinnaanermut annertuumik qaffaapput, tunisassiorfillu taamaalilluni suliassaqanngeratassagaluarpat matusariaarullugu sumiiffimmi aalisarneqartartut annertussusaannut illoqarfimmilu aalisartut 25-t namminersortut tulaattagaannut nalimmassarpoq.
Aammattaaq aningaasaliinikkut aalisakkap qeritinneqartarnerata sivisussusaa annikillingaatsiarmat taamaalilluni aalisakkap qaqerlaap pitsaassusaa pitsaanerusumik attatiinnarneqarpoq. Tamatuma saniatigut aalisakkat siornatigut kipparissunngorlugit qeritinneqartaraluartut maanna ataasiakkaarlugit qeritinneqartalerput (IQF), taamaalillutillu pisisartutta pisariinnerusumik passussinnaavaat.
Tunisassiorfimmi oqimaatsunik kivitsisoqartarneq pisariaarummat taarsersuineq sullivimmi avatangiisinut aamma annertuumik pitsanngorsaataavoq. Tamatumunnga taarsiullugu aalisagaq ingerlaartunut ilineqartarpoq, aalisagarlu ingerlaartukkut qerinasuartitsivikkoorluni poortuutissamut toqqaannartumik ingerlatinneqartarpoq.
Tunisassiornissaminut piareeqqavoq - tunisassiorfik takuuk.
”Suliffipput taamanimut sanilliullugu anginngilaq, nutaamilli qerinasuartitsiveqalernitsigut najukkami aalisartut pitsaasumik sullissinnaallugillu pisisartutsinnut pitsaasunik tunisassiorsinnaavugut” Niels Sakariassen oqarpoq "Aalisartut aalisakkat ilivitsut erlaviikkallu tunisassiorfimmut tunisarpaat, uagullu aalisagaq sukkasuumik tunisassiaralugulu qerinasuartitsivimmut ingerlaartulimmut iliorartarparput, kingornalu qerinasuartinneqarlunilu imermik minguitsumik illersuuseriarlugu scantainerinut poortorneqartarpoq".
Qerititseriaaseq nutaaq pisisartunut aamma nuannaarutaavoq, pitsaassusermi nutaaq anguneqartoq naapertorlugu atuisinnaanermut periarfissaqarnerulerlunilu passussisinnaaneq pisariinnerulerpoq."Aalisagaq pitsaalluinnartoq pisisartutsinnut tunisinnaagatsigu naammagisimaarluinnarpara" Niels Sakariassen oqarpoq.
Narsaq - illoqarfeeraq kialaartumik silaannalik
Narsami innuttaasut 1.300-t missaanniipput, Royal Greenlandip tunisassiorfia illoqarfiup qeqqani nunatsinni toqoraaviit kisiartaat illoqatigalugu inissisimavoq. Nunatta kujaterpiaani silaannaq kialaarmat savaateqartoqarsinnaallunilu tuttuuteqartoqarsinnaavoq, taamatuttaarlu aasaanerani naasartunik soorlu naatsiianik naatitsisoqarsinnaavoq. Niels Sakariassenip illoqarfimmi nuannersumi angalaaruppaatigut, taamaalillutalu naatsiiviit nerisassanillu naatitsiviit akornanni avannaani qeriuaannartumut ungasinnerput takusinnaavarput. Angalaarluarina!
"Royal Greenland naapiguk" pillugu
"Royal Greenland naapiguk" pillugu
Royal Greenland naapiguk' pillugu allaaserisatsinni Royal Greenlandip immikkoortortaani assigiinngitsuni takornariartissavatsigit; Nunatta kitaata sineriaani tunitsivinnit minnerniit kilisaassuarnut avaatsiorlutik tunisassiortunut, nunani tamalaani tuniniaavitsinniit allarpassuarnut. Royal Greenland Naapiguk atuarluariuk!
Allaaserisat sisamaat Ilulissanik raajanik tunisassiornermut tunngasoq atuaruk
