Avataq seqinnarissuarmi atertaartinneqarpoq

Qaaqqusat innuttaasullu 250-it missaanniittut issikkaluartoq atsiisup puiaasamik champagnemik imalimmik umiarsuarmut kusanaqisumut igeriussilluni atsiinera najuuffigaat. Tamanna sioqqullugu pisortaanerup Mikael Thinghuusip najuuttunut persuarsiorpalaartumik oqalugiarnermini apeqqut ataaseq qulaajarpaa.
- Avataq ilumut nunatsinni kilisaatini annerpaajunersoq nittartakkatigut attaveqatigiittarfinni eqqartorneqarnikuuvoq. Maanna, oqaluttarfimmiinninni assortorneqarsinnaannginnama qularnarunnaarlugu oqaatigissavara: Avataq 5500-nik bruttoregistertonsinik, tassa tamakkiisumik angissuseqarami nunatsinni kilisaatini annerpaavoq, Mikael Thinghuus oqarpoq, nangipporlu:

- Soorlu aamma takusinnaagissi, iluserilluni, tungujuffaarimmik qalipaateqarluni maligaasartumillu Royal Greenlandip ilisarnaataanik allassimasoqarluni nunatsinni kilisaatini kusanarnersaavoq.

Inuttanit kissaatigineqarpoq

Mikael Thinghuusip Royal Greenlandip kilisaataataanik nutarsaanissaq kilisaatini inuttanit kissaatigineqarsimasoq kingorna oqalugiaammini eqqaavaa. Suliffeqarfissuarmi aningaasaqarnikkut ajornartorsiungaatsialeruttortumi pisortanngorlaanerani, ukiut arfineq-pingasut quligilualluunniit matuma siorna, tamanna kissaatigineqarsimavoq. 

Suliffeqarfissuarmi umiarsuit naalagaasa inuttallu ataatsimeeqatiginerat ataaseq aalajangersimasoq oqaluttuaraa. Naalakkat aalisarnermi eqinnaassuseq tunisassiorluarnissarlu ukkataralugit ataasimiinnermi saqqummiisut nammineq aningaasanik sipaarniarnissaq aningaasaliissutinillu kinguartitsinissaq oqaluuserissallugit ataatsimiinnermut peqataaniarluni ornigussimavoq.

- Saqqummiussallu tamarmik kilisaataatit taarsersornerisa pitsaaqutaat tamaasa nassuiarlugit, periarfissarpassuit atorluarneqarsinnaasut nutaat, soorlu aalisariaatsit nutaat, ataatsikkut pingasunik qaloqarluni kilisannerup, igitsisarunnaarnissap inuttanullu ataasiittarissanik ineeraqartitsinissap pitsaaqutai nassuiarlugit aamma naaneqartarput, Mikael Thinghuus oqarpoq, nangipporlu:

- Royal Greenlandimi kilisaataatinik nutarterinissamik ilungersuuteqarneq pisortaqatigiinneernani, siulersuisuneeranilu piginnittutsinneersuunngilaq. Kilisaatini inuttaneerpoq. Kilisaatit nutarternissaannut aningaasaliinissamik pilersaarusiorneq oqaluttuarisaanitsini annerpaaq, maannalu Avatap tunniunneqarnerani affaanut killittoq, inuttatsinnit pingaarnermik aallarnerneqarpoq.

Naalagaq killitsittoq

Kilisaat atserneqareermat Avatami umiarsuup naalagaa Jogvan Tróndarson oqalugiarpoq. Taassuma Avatap sananeqarnera tamaat peqataaffiginikuuaa.

- Umiarsuup sananeqarneranut peqataaneq nuannerluinnarpoq. Pikkunarpoq nuannerlunili, sapinngisatsinnilli iliortugut, ilisimasagut misilittakkagullu tamaasa suliniummut iluaqutissatut tunniussimagigut qamuuna misigaanga, Jogvan Trondarson killitsisimangaatsiarluni taama oqarpoq, nangipporlu:

- Umiarsuaq atsiisup Ane Louise Fleischerip ullumi atertaatitaa umiarsuatsialaavoq. Suliamut ikiuutaagama soorlu tassa qimuttuitsunut ilaallunga. Qimuttuitsut perlaakkut apuuffissaminnut ingerlapput. Inuit Kalaallit Nunaanneersut, Danmarkimeersut, Savalimmiuneersut, piffinni assigiinngitsuni soorlu Norgemiit, Polenimiit, Tyrkiamiit minnerunngitsumillu Spaniamiit – Baskit nunaata qiterpiaaneersut qimuttuitsunut ilaapput.

Soorlu piniartoq qimusserluni, ittoquteqarluni qimuttoqarlunilu piniarfissaminukartoq, aamma qajartorluni piniartoq, malussarissutsiminik, misilittakkaminik ilisimasaminillu atorluaasoq.

Qimuttuitsumut tassunga ilaasinnaagama tulluusimaarutigeqalugu oqartariaqarpunga. Inuit pikkorissorsuit. Ullumikkut immitsinnut isikkut isigaluta angusaq nuannaarutigisinnaavarput.

Uanga inuttallu sinnerlugit tatiginninnissinnut qujarusuppunga, pisinnaatitaaneralu atorlugu nunamut umiarsuaatileqatigiiffimmullu iluaqutaasussamik pitsaanerpaamik angusaqarnissamut suliniarumaarpunga.

Atertaartitsisoqareermat qaaqqusat Avatamut kialaartumut ikinisinnaanngorput, kilisaammilu inuttat qaaqqusanut sassaalliillutillu takornariartitsipput.

Avataq, atertaartitsinermut unnummullu kultoorisiorfimmut atatillugu nalunaaqutaq 15:00-imiit 19:00-imut tamanut ammatinneqartoq, ullup ingerlanerani Nuummi innuttaasunit takusarneqarsinnaavoq. Takusaasut 2.400-niit ikinnerunngitsut arfininngornermi Avataq takusarsimavaat.

Avatap atertaartinneqarneraniit assit allaaserisap ataani takukkit.