Ilaqutariilluni Canadami misigisassarsiorneq

Royal Greenland nunani tamalaani tuniniaaveqarluni tunisassiorfeqarpoq, Mika Heilmannilu Royal Greenlandip tunisassiorfiisa ilaanni Canadamiittumi ingerlatsisutut atorfimmik neqeroorfigitimmat ilaqutariiaqqat Nuummeersut qulanngillat.

- Canadamukarnissamut periarfissaqaleratta qulanngilagut. Nukangasunilli meeraqaraanni assigiinngitsunik isumagisassarpaaloqarpoq, Mika Heilmann, Canadami atorfininnini sioqqullugu Royal Greenlandip qullersaqarfiani Nuummiittumi inuttalerinermik ingerlatsisuusimasoq, oqaluttuarpoq.

Ilaqutariit Nuummi inuunertik illoqarfissuarmi St. John’simut 184.410-inik innuttaasulimmut nuuppaat. Mika tunisassiorfimmi Cape Broylemiittumi, St. John’simiit akunneq ataaseq biilerluni ungasissusilimmi, suligaangat nuliata Lindap meeqqatik, Lukas Malik ataatsimik ukiulik Ajâjalu tallimanik ukiulik angerlarsimaqatigisarpai.

Ilaqutariit St. Johnsimi, illoqarfimmi annerpaami Canadallu ilaani Newfoundlandimi Labradorimilu illoqarfiit pingaarnersaanni, najugaqarput.

Attaveqaqateqarluarnissaq pingaaruteqarpoq

Ilaqutariit nuunnertik ilungersunaqqaassasoq ilisimareerpaat. Nuna piorsarsimassuserlu allaanerit, tuluttullu oqaatsit ulluinnarni oqaaserinngisatik nuuffigisussanngorpaat.

Ingerlalluarumagaanni attaveqaqatigilluarsinnaasanik nalunngisaqarnissaq pingaaruteqarpoq. Taamaammat paniat tallimanik ukiulik meeqqat atuarfianni atualermat oqiliallannaqaaq.

Ajâja tallimanik ukiulik meeqqallu atuarfianni atuartoq atuarfittaamini nuannarineqaqaaq.

- Apriilimiit juuli ilanngullugu saattuarniarfiup nalaani ullaamiit unnummut sulisarpunga, taamaammat nooqqaarnerput tamatsinnut pikkunarpoq. Taamaammattaaq panipput meeqqat atuarfianni septembarimi atualerami ingerlalluangaarmat oqiliallannarpoq. Atuarfimmi tuluttut oqalungaatsiartarlunilu ikinngutitaartorpoq. Meeqqat atuarfianni atuartut anginerit allaat panipput nuannaraat, ataataq tulluusimaartoq oqaluttuarpoq.

Ilaqutariit Canadamut tikeqqammerlutik sapaammi niuertarfissualiarput. Ilaqutariit piffissami tassani suli attaveqaqateqarlualinngillat, taamaammat arnap kalaallip saaffigimmatik tupaallapput.

- Arnaq takkuteriataarami kalaallisut oqalunnersugut kalaallisut aperaatigut. Taamaalilluta Arnannguaq, ukiorpassuarni Canadami najugaqarsimasoq, naapipparput. Aammattaaq Anders Kalaallit Nunaanneersoq naapipparput, Mika oqarpoq.

Ilaqutariit kalaallinik nalunngisartaarnermik saniatigut Canadamiunik nereqatigiinnissamut kaffillernermullu qaaqqusimasaminnik ikinngutitaarput.

Allanartoq ilisarnartorli

Mika Heilmannip ilaqutai aalisarnermut attuumassuteqartuaannarsimapput, Mikallu ataataa 1982-imili Royal Greenlandimi sulisuuvoq.

- Meeraasunga ataatama suliartoraangami ilagillattaasarnikuummanga tunisassiorfinni assigiinngitsuni peroriartornikuusunga oqartoqarsinnaavoq. Uanga nammineq 2012-imi Royal Greenlandimi atorfinikkamali suliakka qaffakkiartorput. Suna tamarmi takornartaammat illoqarfimmut allamut nuunneq pissanganarpoq. Aalisarnermili sulineq sungiusimagakku suliat ilisarnarput.

Canadami inuuneq Kalaallit Nunaanni inuunermiit allaanerugaluaqisoq ilaqutariit sungiussipallapput.

Tunisassiorfik illoqarfeeqqami Canadamiittumi Cape Broylemi 490-it missaanni innuttaasoqartumi inissisimavoq.

- Ilaqutariittut suleqatigiillaqqippugut, taamaalillutalu ulluinnaat ingerlaterujoorsinnaavagut. Piffissaligaanngitsumik maaniippugut, siunissarlu qanoq ikkumaarnersoq piffissap takutikkumaarpaa. Periarfissinneqarnera soorunami nuannaarutigaara, Mika Heilmann naggasiivoq.

Ilaqutariiaqqat orpippassuarniittut. Nuliaasoq Linda saamerlermi, ernerat Lukas Malik ataatsimik ukiulik, Mika kiisalu paniat Ajâja tallimanik ukiulik.

Mika Heilmann nunami allami sulinissaminut periarfissinneqartuni kisiartaanngilaq. Royal Greenlandimi sulisut arlallit piffissap ingerlanerani nunani allani atorfininnissaminnut periarfissinneqartarput.

- Sulisutta suliffitsik suliffeqarfittut nunani tamalaani immikkoortortalittut ilisimassagaat kissaatigaarput. Inuusuttorpassuarnik pikkorissorpassuarnillu, nunani tamalaani immikkoortortatsinni tunniussaqarluarsinnaasunik sulisorpassuaqarpugut, Jens K. Lyberth, Attaveqatigiinnermut Sulisoqarnermullu pisortaq, oqaluttuarpoq.”