Nunarput qeqqussanik naatitsisartunngussaaq

Royal Greenland ukiuni arlalinni assigiinngitsunik misileraareerluni qeqqussanik niuerutissatut naatitsisinnaanngorpoq.

Maanna Maniitsup eqqaani qeqqussanik naatitsivimmut millionilikkaanik aningaasaliisoqareerpoq. Aasamut 32 tonsinik katersinissaq pilersaarutaavoq. Lars Nielsen, Royal Greenlandimi tunisassiornermi pisortaasoq, taama oqaluttuarpoq.

- Nunatsinni qeqqussanik pitsaalluinnartunik naatitsinissaq periarfissatsialaavoq, periarfissarlu taanna massakkut atorniarparput. Soorunami nammineerluta tunisassiarisinnaasatsinnik nunanilu allani pisisartunut tuniniarsinnaasatsinnik katersilluarnissarput neriuutigaarput, Lars Nielsen oqaluttuarpoq.

Maniitsulli eqqaani naatitsivik aallarniutaannaavoq.

Tunisassiornerup annertusaqattaarnissaanik siunertaqarneq

Tunisassiornermi ingerlalluarpat ukiuni tulliuttuni annertusaangaatsiarnissaq pilersaarutaavoq.

- Nunatsinni qeqqussanik naatitsineq neriunaateqarluarpoq. Tamanna peqqutigalugu aningaasaliivugut. Siunissami 32 tonsinit aasamut katersugassatut naatsorsuutigisatsinnit amerlanerungaatsiartunik tunisassiornissarput neriuutigaarput, Lars Nielsen nassuiaavoq.

Qeqqussanik naatitsivik nutaaq Maniitsup eqqaaniippoq. Naatitseriaaseq Norgemi ineriartortinneqarsimasoq Arctic Seaweedimeersuuvoq, matumanilu naatitsivimmi isorartunngitsumi taamaallaat 150 miiterisut takissuseqarlunilu 50 miiterisut silissusilimmi qeqqussanik allunaasani 16 kilomiiterisut takissusilinni naatitsisoqarsinnaavoq.

Ukiuni arlalinni piareersarneq

Royal Greenlandimi qeqqussanik tunisassiornermi, biologi Nikoline Ziemer suliniummik aallarniisimasoq, ulluinnarni aqutsisuuvoq.   

- Qeqqussanik niuerutissatut naatitsisinnaanerput nuannerluinnarpoq. Najukkami tunisassiornerup ineriartortinnissaanut kiisalu Royal Greenlandimi nunatsinnilu aningaasarsiornerup pitsaanerulersinnissaanut periarfissaalluarpoq, Nikoline oqarpoq.

Qeqqussanik naatitsivik aggustimi ikkussorneqartoq Maniitsup kangiatungaani 3,5 sømilinik ungasissusilimmi Inuttuup eqqaani inissisimavoq. 

- Naatitsivik alakkarneqarsinnaavoq kisianni allunaasat qeqqussanik naatitsiviit arlaqarnerat naatitsivillu angallatinit angalaffigineqaqqusaananilu taamaallaat sungaartunik nalunaarsukkat avaqqullugit angalasoqaqqusaanera eqqumaffigineqassaaq, Nikoline nassuiaavoq.

Naatitsiviup teqeqquini nalunaaqutsikkat sisamaasut qulleqarlutillu taartumi takuneqarsinnaapputtaaq.

Sulluitsut uisullu naatinneqartarput, taakkulu ilaatigut qeqqussanik salatinut pestomullu atorneqarsinnaapput.