Royal Greenlandip Neriuffimmut 116.258 koruunit tunissutigai

Agathe Dahl Thorleifsenip Brian Rosing Kleistillu, qullersaqarfiup kilisaateqarfianeersuusut, tallimanngormat toqqaannartumik TV-kkut aallakaatitsinermut atatillugu suliffeqarfissuup tunissutai 116.258 koruuniusut tulluusimaarlutik tunniuppaat.

- Sinerissami suleqatigut tamaasa sinnerlugit, kattuffimmut pingaarutilimmut checkimik aningaasarpassuarnik nalilimmik tunniussisinnaanera tulluusimaarutigaara. Aallakaatitsinermut kræftimik eqqugaasimasunik qanigisaasunillu tapersersuinissamik siunertalimmut peqataaneq attortinnarpoq, Brian Rosing Kleist oqaluttuarpoq.

Aningaasat ukiut tamaasa amerlisarput

Royal Greenlandip sinerissami tunitsiviini tunisassiorfiinilu, kilisaataataani Nuummilu qullersaqarfiani sulisut pisarnertut akissarsiatigut ilanngaaffigitinnikkut Neriuffiup nuna tamakkerlugu katersuiniarneranut tapiissuteqarsimapput. Tapiissutit taakku Royal Greenlandip tapiissuteqartarnermut suleqatigiissitaanit marloriaatinngortinneqartarput.

Royal Greenlandimi Attaveqatigiinnermut Sulisoqarnermullu pisortap Jens K. Lyberthip sulisut tapiilluaqqinnerat qujamasuutigaa.

- Kikkulluunniit eqqugaasinnaapput. Amerlanertigut ilaquttat najugarlu qimallugit katsorsartinneq Danmarkimi ingerlanneqartarpoq. Taamaammat sulisut aningaasanik taamak amerlatigisunik nuna tamakkerlugu katersuiniarnermut katersisimanerat torrallaaneruvoq, aningaasammi ilaqutariit eqqugaasut piffissami ilungersunartumi peqatigiissinnaanerannik qulakkeerinneqataassapput, Jens K. Lyberth oqarpoq.

Sulisut tapiinerisa saniatigut Royal Greenland Taseralimmi Sisimiuniittumi Neriuffimmut katersuiniarnermut atatillugu nerisassanik tapiissuteqarpoq. Royal Greenlandimi sulisut siorna 2021-mi Neriuffimmut 108.085,20 koruuninik katersisimapput.