Royal Greenland nunani tamalaani misilittagalimmik suliffeqarfissuup pisortaqatigiivini atorfinitsitsivoq
Bruno Olesen ukioq naappat soraarninngussammat Hollandimiu Robert-Jan Treebus nunani tamalaani tuniniaanermut akisussaasunngussaaq.
Royal Greenland niuerfiit nunani tamalaaniittut akimorlugit siammasissumik iluanaarutaasumillu tuniniaaneq nalorninartunillu patajaatsumik siammarterinermik anguniagaqarpoq, taamaammallu Nunani Tamalaani Tuniniaanermut Pisortamik atorfinitsitsiniarnermi nunani tamalaani misilittagalimmik atorfinitsitsinissap qulakkeerneqarnissaa pingaartinneqarpoq.
Robert-Janip FMCG-mi niuernikkut atorfiit assigiinngitsut ukiut 25-it sinnerlugit misilittagaqarfigigamigit Royal Greenlandip anguniagaanut naleqqulluinnarpoq. Treebus kingullermik Advanced Power Solutionimi niuerfinni Europamiittuni nittarsaassinermut tuniniaanermullu pisortaasimavoq. Robert-Jan siornatigut USA-mi Glatfelterimi tuniniaanermut pisortaasimallunilu Unileverimi nunani assigiinngitsuni sisamani assigiinngitsunik atorfeqartarsimavoq, ilaatigut tunisassianut immikkoortukkaanut periusissiorneq, periusissaq naapertorlugu tuniniaasunik isumaqatigiinniarneq pisisartunillu nalunaarsukkanik aqutsineq akisussaaffigisarsimavai.
Treebusip 2023-mi novembarip 13-iani Royal Greenlandip pisortaqatigiivinut ilannguttussap ukiup naanissaata tungaanut Bruno Olesen qanimut suleqatigissavaa. Susanne Arfelt Rajamand atorfinitsitsinermut ima oqaaseqarpoq:
”Royal Greenlandip Robert-Jan Treebusimut ilisaritinnissaa qilanaaraara. Nunani tamalaani misilittagaqarnera piumassuseqarluarneralu suliffeqarfimmut iluaqutaassapput. Tamatumunngattaaq ilanngullugu Bruno Olesen ukiorpassuarni sulilluarsimaneranut qutsavigalugulu suliaqarfimmini ilisimasaqarluarnermigut piffissap ilaani Robert-Jan Treebusimut tapertaanissaanut qutsavigaara.”
Robert-Jan Hollandimi peroriartorpoq, tassanilu aqutsinermi ataqatigiissaarinermilu masteritut ilinniarsimavoq, tamanna kingorna isumaqatigiinniarnermut periusinik, attaveqatigiinnermut attaveqaatinillu atuinermut sungiusarnermik kiisalu Parisimi ESSEC-imi Pisortatut pikkorissarnermik tapertalerpaa. Atorfeqartarnermini Hollandimi, Tysklandimi, USA-mi, Polenimi Belgiamilu najugaqartarsimavoq, Royal Greenlandimilu atorfininnerminut atatillugu nunani tamalaani niuerfiit Kalaallit Nunaallu tikikkuminarnerussammata Danmarkimi najugaqassaaq.
Robert-Jan Treebus
Robert-Jan Treebus
”Royal Greenlandimi, suliffeqarfimmi oqaluttuassaqaqisumi, piujuartitsinermut tunniusimasumi, aalisakkanik qalerualinnillu tunisassianik pitsaalluinnartunik pilersuinermik ilungersuuteqartumi atorfininnissara tulluusimaarutigingaarpara. Suleqatigiinnut arajutsisassaanngitsunut ilanngunnissara suliffeqarfiullu ingerlalluaannarnissaanut suleqataanissara qilanaaraara.” Treebus oqaluttuarpoq.
Paasisaqarnerorusukkuit Pisortaaneq Susanne Arfelt Rajamand oqarasuaammut + 299 56 02 08-imut sianerlutit saaffigisinnaavat.
